ठाणे, 3 ऑक्टोबर (हिं.स.) : अनेक वर्षांपासून नोकरीच्या प्रतिक्षेत असलेल्या गरजू कुटुंबांसाठी शासनाकडून एक अत्यंत आनंदाचा निर्णय घेण्यात आला आहे. ठाणे जिल्हाधिकारी कार्यालयाने अनुकंपा तत्त्वावरील नियुक्ती प्रक्रियेला गती देऊन, शेकडो कुटुंबांच्या जीवनात आशेचा नवा किरण आणला आहे. या नियुक्तीमुळे केवळ नोकरीच नाही, तर त्या कुटुंबांना मोठा भावनिक आणि आर्थिक आधार मिळाला आहे, ज्यांनी आपल्या कर्त्या पुरुषाला गमावले आहे.

शासनाचा संवेदनशील निर्णय

राज्यातील अनुकंपा नियुक्तीची प्रक्रिया वेगवान करण्यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्या नेतृत्वाखालील शासनाने 150 दिवसांच्या कार्यक्रमांतर्गत अनुकंपा नियुक्ती देणे, या बाबीचा समावेश केला होता आणि ही कार्यवाही पूर्ण करण्याकडे विशेष लक्ष दिले होते.

प्रशासनाने घेतलेल्या कठोर परिश्रमांमुळे अनेक प्रलंबित प्रकरणे मार्गी लागली आहेत. या नियुक्ती प्रक्रियेत केवळ नियमांचे पालन केले नाही, तर प्रत्येक कुटुंबाच्या भावनांचा आणि गरजांचा संवेदनशीलतेने विचार करण्यात आला. या प्रयत्नांमुळे, एका क्षणात अनेक घरांमध्ये आनंद परतला आहे.

नियुक्ती पत्रांचे वाटप: एक भावनिक क्षण

नियुक्तीपत्रांचे वाटप शनिवार, ४ ऑक्टोबर रोजी होणार आहे. मुंबई येथे सकाळी ११ वाजता होणाऱ्या राज्यस्तरीय मुख्य कार्यक्रमात मुख्यमंत्र्यांच्या उपस्थितीत नियुक्ती पत्रे दिली जातील. त्याचप्रमाणे, प्रत्येक जिल्ह्याच्या जिल्हाधिकारी कार्यालयात स्थानिक कार्यक्रमांचे आयोजन करण्यात आले आहे. ठाणे जिल्ह्याचा कार्यक्रम हा जिल्हा नियोजन भवन सभागृहात शनिवार, दि.४ ऑक्टोबर रोजी सकाळी ११ वाजता आयोजित करण्यात आला आहे. हा क्षण केवळ एक शासकीय सोहळा नसून, तो अनेक वर्षांच्या संघर्षाचा आणि प्रतिक्षेचा शेवट आहे. हे नियुक्ती पत्र म्हणजे केवळ एक कागद नसून, ते एका कुटुंबाचे भविष्य आहे, त्यांच्या आत्मसन्मानाची पुनर्स्थापना आहे.

मेळाव्यातील यश आणि पुढील कार्यवाही

यापूर्वी, ठाणे जिल्हाधिकारी कार्यालयामार्फत १ आणि १८ सप्टेंबर रोजी आयोजित केलेल्या मेळाव्यात एकूण ५९ अनुकंपाधारक उमेदवार उपस्थित होते. या मेळाव्यात १५ सरकारी कार्यालयांमधील गट 'क' संवर्गातील ५७ उमेदवारांना अनुकंपा तत्त्वावर नोकरीसाठी शिफारस करण्यात आली. यात २०१३ पासून प्रतिक्षा करीत असलेल्या काही जुन्या प्रकरणांचाही समावेश होता. या यशस्वी कार्यवाहीमुळे, जनतेचा प्रशासनावरील विश्वास अधिक दृढ झाला आहे. उर्वरित दोन जणांच्या शैक्षणिक व इतर पात्रतेनुसार रिक्त पदे उपलब्ध होताच त्यांनाही शासकीय कार्यालयात नियुक्ती देण्याविषयीची संधी राखून ठेवण्यात आली आहे. याचबरोबर ठाणे जिल्ह्यातील विविध शासकीय कार्यालयातील गट ड संवर्गातील प्रतिक्षा सूची मधील ६७ अनुकंपा उमेदवारांना अनुकंपा तत्त्वावर नियुक्ती देण्याची कार्यवाही शासकीय कार्यालयाकडून करण्यात आली आहे.

समुपदेशन मेळावा

ठाणे ज़िल्ह्यात पात्र अनुकंपा तत्वावरील पात्र उमेदवाराच्या सोबत विविध कार्यालयाच्या आस्थापना विभागासोबत एकत्रित बैठक घेऊन

उपलब्ध पदे, शैक्षणिक अहर्ता, पात्रता, वेतनश्रेणी, कामाचे स्वरूप, पदोन्नतील संधी, विशेष प्रावीण्य, तंत्रज्ञ इ. माहिती देण्यात आली होती. त्यामुळे घरातील कर्त्या माणसाच्या अवेळी जाण्याने आधार तुटलेल्या पाल्याना अनुकंपा उमेदवारांसाठी शासकीय नोकरीत येण्यासाठी आणि मिळालेल्या संधीची योग्य निवड करण्यासाठी जिल्हाधिकारी कार्यालयाचे मार्गदर्शन सुखद,समाधानाचे आणि आशा उंचावणारे ठरले.

आणखी एक विशेष बाब म्हणजे

पोलीस आयुक्तालय व ग्रामीण पोलीस विभागातून यापूर्वी अनुकंपा तत्वावर विशेषत: पोलीस विभागातच नेमणूक होत होती. त्यामुळे शारीरिक पात्रता नसल्यास किंवा रिक्त पदे नसल्यास अनुकंपाचा लाभ मिळताना अडचणी येत होत्या. या कारणास्तव अनेक वर्षांपासून नियुक्या रखडल्या होत्या. त्याबाबत निवासी उपजिल्हाधिकारी डॉ.संदीप माने यांनी पुढाकार घेवून, विभागीय पातळीवरील तसेच जीएसटी विभागातील उपलब्ध रिक्त पदे ठाणे जिल्हयासाठी उपलब्ध करून घेतली. ठाणे जिल्ह्यात तिन्ही पोलीस आयुक्तालये आणि पोलीस अधीक्षक यांच्या कार्यालयाच्या बैठका घेतल्याने पोलीस विभागासह अनुकंपा प्रतिक्षा यादीतील जास्तीत जास्त उमेदवारांना जास्तीची संधी उपलब्ध झाली.

ही संपूर्ण कार्यवाही करण्यासाठी जिल्हाधिकारी डॉ. श्रीकृष्ण पांचाळ,अपर जिल्हाधिकारी हरिश्चंद्र पाटील निवासी उपजिल्हाधिकारी डॉ.संदीप माने यांच्या मार्गदर्शनाखाली तहसिलदार रेवण लेंभे आणि आस्थापना विभागातील सर्व अधिकारी कर्मचाऱ्यांनी गेले चार ते पाच दिवस अहोरात्र विशेष मेहनत घेतली. त्यामुळे हे नियुक्तीपत्र मिळविणारे अनेक तरुण-तरुणी, वृद्ध आई-वडील आणि निराधार कुटुंबासाठी हा केवळ एक सरकारी आदेश नाही, तर त्यांच्या आयुष्यातील एक नवी सुरुवात आहे. या निर्णयामुळे शासनाने आणि प्रशासनाने हे सिद्ध केले आहे की, त्यांच्यासाठी केवळ विकासच नव्हे, तर प्रत्येक नागरिकाची काळजी घेणे, ही सुद्धा प्राथमिकता आहे.

---------------

हिंदुस्थान समाचार / सुधांशू जोशी