जळगाव, 30 ऑक्टोबर (हिं.स.) दोन गटांमध्ये असलेल्या वादाचे रूपांतर हाणामारीत होऊन एका बंद्याला चौघांनी कुठल्यातरी वस्तूने डोक्याला मारून गंभीर दुखापत केल्याची खळबळजनक घटना उघडकीस आली असून या घटनेमुळे कारागृहाची सुरक्षितता धोक्यात आली असल्याचे बोलले जात आहे. जिल्हा कारागृहात तेजस दिलीप सोनवणे (२५) हा एका गुन्ह्यात कारागृहात बंदी असून तो बॅरेक २ मध्ये झोपलेला असताना,आरोपी पराग रविंद्र आरखे, बबलू उर्फ विशाल राजू गागले, भूषण विजय माळी उर्फ भाचा आणि सचिन कैलास चव्हाण या चौघांनी तेजसला शिवीगाळ करण्यास सुरुवात केली. तेजसने शिवीगाळ करण्याचे कारण विचारले असता, आरोपींनी “तू भूषण माळी उर्फ भाचा याच्या विरुद्ध असून त्याच्या नादी लागतो का?” असे धमकावले. यानंतर चौघांनी तेजसला शिवीगाळ करत, त्याच्या डोक्याच्या मागच्या बाजूला कुठल्यातरी वस्तूने वार करून गंभीर जखमी त्याला जीवे मारण्याची धमकी दिली. दरम्यान हा प्रकार घडत असतांना ड्युटीवर असणाऱ्या पोलिसांनी हस्तक्षेप करून त्यांच्यामधील तंटा मिटविला . या मारहाणीत जखमी झालेल्या तेजस सोनवणे याला तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले असून रात्री जखमी तेजस सोनवणे याच्या तक्रारीवरून जिल्हापेठ पोलीस ठाण्यात आरोपी पराग आरखे, बबलू गागले, भूषण माळी उर्फ भाचा आणि सचिन चव्हाण या चार बंदींविरुद्ध गुन्हा दाखल करण्यात आला आहे.

---------------

हिंदुस्थान समाचार / मनोहर कांडेकर