जळगाव, 30 ऑक्टोबर (हिं.स.)एलसीबीच्या तावडीतून बेड्यांसह फरार झालेल्या दोन गुन्हेगारांपैकी एक अमजद फकिरा कुरेशी (रा. मेहरुण, जळगाव) याला अखेर जळगाव स्थानिक गुन्हे शाखेच्या पथकाने दिल्ली येथे पकडण्यात यश मिळविले आहे. या अटकेमुळे काही दिवसांपासून गाजत असलेल्या घटनेला अखेर पूर्णविराम लागला आहे. काही दिवसांपूर्वी एलसीबीचे पथक आरोपींना जळगावहून अमळनेरकडे घेऊन येत असताना रात्री साडेअकरा वाजता कुऱ्हे गावाजवळील सतीमाता मंदिराच्या अंडरपासजवळ वाहनाचा वेग कमी होताच, आरोपींनी मागच्या सीटवरून उडी मारून पलायन केले. बेड्या लागलेल्या अवस्थेत त्यांनी अंधाराचा फायदा घेत रेल्वे रुळ ओलांडून शेतात पसार होत पोलिसांना चकवा दिला होता. या निष्काळजीपणाबद्दल आरोपींना आणणाऱ्या चार पोलिस कर्मचाऱ्यांवर निलंबनाची कारवाई करण्यात आली होती. दरम्यान, तपासादरम्यान पोलिसांना माहिती मिळाली की अमजद कुरेशीची पत्नी दिल्ली येथे वास्तव्यास आहे. त्या धाग्यावरून तसेच तांत्रिक पुरावे व लोकेशनच्या आधारे पोलिसांनी शोधमोहीम राबवून दिल्लीतील एका ठिकाणाहून कुरेशीला बेड्यांसकट ताब्यात घेतले. त्यानंतर त्याला अमळनेर पोलिसांच्या स्वाधीन करण्यात आले.

ही कारवाई पीएसआय जितेंद्र वल्टे, ग्रेड पीएसआय रवी नरवाडे, हवालदार गोपाल गव्हाळे, अक्रम शेख, प्रवीण भालेराव, हरिलाल पाटील, संदीप पाटील, राहुल कोळी आणि दीपक चौधरी यांच्या पथकाने केली. अटकेनंतर अमळनेर पोलिसांनी आरोपीला न्यायालयात हजर केले असता न्यायालयाने त्याला एक दिवसांची पोलिस कोठडी सुनावली आहे.

---------------

हिंदुस्थान समाचार / मनोहर कांडेकर