हैदराबाद, 31 ऑक्टोबर (हिं.स.) : काँग्रेस नेते आणि माजी क्रिकेटपटू मोहम्मद अझरुद्दीन यांनी तेलंगणा सरकारमध्ये मंत्रीपदाची शपथ घेतली. राज्यपाल जिष्णु देव वर्मा यांनी त्यांना शपथ दिली. अझरुद्दीन यांची ही नियुक्ती जुबली हिल्स पोटनिवडणुकीसाठी महत्त्वाची मानली जात आहे, कारण त्या मतदारसंघात मुस्लिम मतदार निर्णायक भूमिका बजावू शकतात.

काँग्रेसचे वरिष्ठ नेते आणि भारतीय क्रिकेट संघाचे माजी कर्णधार मोहम्मद अझरुद्दीन यांना तेलंगणा सरकारने आपल्या मंत्रिमंडळात स्थान दिले आहे. त्यांनी मुख्यमंत्री ए. रेवंत रेड्डी यांच्या नेतृत्वाखालील सरकारमध्ये शुक्रवारी मंत्रीपदाची शपथ घेतली. तेलंगणा राजभवनात आयोजित समारंभात राज्यपाल जिष्णु देव वर्मा यांनी मुख्यमंत्री आणि अनेक महत्त्वाच्या नेत्यांच्या उपस्थितीत माजी भारतीय क्रिकेटपटू अझरुद्दीन यांना शपथ दिली. अझरुद्दीन यांच्या समावेशानंतर मंत्रिमंडळातील एकूण सदस्यसंख्या 16 झाली असून, आणखी 2 सदस्यांचा समावेश होऊ शकतो. राज्य विधानसभेच्या एकूण सदस्यसंख्येनुसार, येथे कमाल 18 मंत्री असू शकतात.

मोहम्मद अझरुद्दीन यांची मंत्रीपदावर नियुक्ती हा एक महत्त्वपूर्ण राजकीय निर्णय मानला जात आहे, कारण काँग्रेस पक्ष जुबली हिल्स पोटनिवडणुकीत पूर्ण ताकदीने उतरला आहे. या मतदारसंघात एक लाखांहून अधिक मुस्लिम मतदार आहेत, जे निकालावर निर्णायक प्रभाव टाकू शकतात.

माहितीनुसार, याच वर्षी जून महिन्यात बीआरएसचे आमदार मंगंती गोपीनाथ यांच्या हृदयविकाराच्या झटक्याने निधन झाल्यामुळे ही जागा रिक्त झाली होती आणि त्या जागेसाठीच आता पोटनिवडणूक होणार आहे. गेल्या ऑगस्ट महिन्यात तेलंगणा सरकारने अझरुद्दीन यांना राज्यपाल कोट्यातून विधान परिषद सदस्य (एमएलसी) म्हणून नियुक्त केले होते, मात्र राज्यपाल जिष्णु देव वर्मा यांनी अद्याप या नियुक्तीला मंजुरी दिलेली नाही. अझरुद्दीन यांनी 2023 च्या निवडणुकीत जुबली हिल्स विधानसभा मतदारसंघातून निवडणूक लढवली होती, परंतु त्यांना पराभवाचा सामना करावा लागला होता.

---------------------

हिंदुस्थान समाचार / अरुण जोशी