पाटणा, १ नोव्हेंबर (हिं.स.) - राष्ट्रीय लोकशाही आघाडी (एनडीए) च्या नेत्यांनी बिहार विधानसभा निवडणुकीच्या प्रचारात सर्वतोपरी प्रयत्न सुरु केले आहेत. एनडीएचे सर्व स्टार प्रचारक जनतेला आकर्षित करण्यात व्यस्त आहेत. दरम्यान, पंतप्रधान नरेंद्र मोदी ६ नोव्हेंबर रोजी मतदानाच्या पहिल्या टप्प्याच्या दिवशी बिहारला भेट देणार असल्याची माहिती आहे. ते भागलपूर आणि अररिया येथे निवडणूक सभांना संबोधित करतील.
भारतीय जनता पक्षाचे राज्य माध्यम प्रभारी प्रभात मालाकर यांनी सांगितले की, पंतप्रधान नरेंद्र मोदी ६ नोव्हेंबर रोजी मतदानाच्या पहिल्या टप्प्याच्या दिवशी बिहारला भेट देणार आहेत. पंतप्रधान मोदी त्या दिवशी दुसऱ्या टप्प्यातील विधानसभा मतदारसंघांमध्ये मतदारांना संबोधित करतील. भागलपूर आणि अररिया येथे पंतप्रधानांच्या मोठ्या सार्वजनिक सभा होणार आहेत. भागलपूरमधील विमानतळ मैदानावर होणाऱ्या या जाहीर सभेत सुमारे ५,००,००० लोक उपस्थित राहण्याची अपेक्षा आहे.
पंतप्रधान नरेंद्र मोदी रविवार २ नोव्हेंबर रोजी पाटणा येथे रोड शो करतील. हा रोड शो संध्याकाळी ५ वाजता दिनकर गोलंबर येथून सुरू होईल आणि कदमकुआन, बारीपथ आणि बाकरगंज मार्गे उद्योग भवन येथे जाईल. या रोड शोसाठी राजधानी पटना येथे कडक सुरक्षा व्यवस्था करण्यात आली आहे. सुमारे २००० पोलिस आणि निमलष्करी दलाचे जवान तैनात करण्यात आले आहेत. वाहतूक वळवण्याचे काम देखील करण्यात आले आहे. कदमकुआन ते दरियापूर हा रस्ता पूर्णपणे बंद राहील.
---------------
हिंदुस्थान समाचार / वृषाली देशपांडे
