रत्नागिरी, 24 नोव्हेंबर, (हिं. स.) मंदिरांच्या जमिनीचे रक्षण करण्यासाठी महाराष्ट्रातही शासनाने अँटीलँड ग्रॅबिंग ॲक्ट (जमीन हडपविरोधी कायदा) तातडीने लागू करावा, या मागणीची निवेदने महाराष्ट्र मंदिर महासंघ आणि मंदिर विश्वस्तांनी जिल्हाधिकारी, प्रांत आणि रत्नागिरी, लांजा, राजापूर, चिपळूण, खेड आणि दापोली येथील तहसीलदारांना दिली.

मंदिरांना राजेमहाराजांनी जमिनी दान दिल्या. हिंदूधर्माची आधारशिला असणाऱ्या मंदिरांना आज त्यांच्याच जमिनी गमावण्याची वेळ आली आहे. कोकणात हजारो एकरांच्या देवराईंच्या सातबारा उताऱ्यावरून मंदिरांची नावे कमी होऊन तेथे महाराष्ट्र शासनाची नावे लागली आहेत. मंदिरांना दिल्या गेलेल्या इनाम जमिनी सुरक्षित राहिलेल्या नाहीत. मंदिरे ही धर्म आणि संस्कृतीचे रक्षण करण्यासह सामाजिक एकोपाही जपतात. त्यामुळे मंदिरांच्या भूमीचे रक्षण करणारा 'अँटी लँड ग्रॅबिंग ॲक्ट' कायदा या हिवाळी अधिवेशनात पारित करावा, अशी अपेक्षा अनेक मंदिर विश्वस्तांनी निवेदन देताना व्यक्त केली.

निवेदन देताना रत्नागिरीत श्री नवलाई पावणाई जाकादेवी महापुरुष (खासगी) देवस्थानचे राजेंद्र सावंत, श्री स्वयंभू काशीविश्वेश्वर देवस्थानाचे देवेंद्र झापडेकर, श्री नवलाई पावणाई वाघजाई काळकाई मंदिराचे शशिकांत जाधव, श्री स्वयंभू धावजेश्वर मंदिराचे राकेश सावंत, लांजा येथे श्री केदारलिंग देवस्थानचे श्रीकृष्ण सरदेसाई, श्री पौलस्तेश्वर मंदिराचे संतोष लिंगायत, श्री बसवेश्वर समाज मंदिरचे मोहन तोडकरी, राजापूर येथे श्री विमलेश्वर मंदिराचे प्रकाश लिंगायत उपस्थित होते. चिपळूण येथे निवेदन देताना भगवान परशुराम देवस्थानचे शंकर कानडे, श्री भैरी- चंडिका देवस्थानचे अध्यक्ष बळीराम चव्हाण, श्री सुकाई- केदार देवस्थानचे अध्यक्ष विशाल परकर, श्री नवलाई देवस्थान समितीचे अध्यक्ष वसंत भोबस्कर, श्री दत्तात्रय देवस्थान ट्रस्टचे अध्यक्ष यशवंत खांडेकर, श्री शंकर-पार्वती देवस्थान ट्रस्टचे खजिनदार राजारामराव भोसले, जयसिंगराव भोसले, दापोली येथे श्रीराम मंदिर व श्री गजानन महाराज मंदिराचे विश्वस्त काशिनाथ पावसे, श्री महालक्ष्मी देवस्थानचे अध्यक्ष रमेश कडू, महाराष्ट्र मंदिर महासंघाचे सुरेश शिंदे, परेश गुजराथी, विलास भुवड, उदय केळुस्कर उपस्थित होते.

निवेदन दिल्यानंतर जिल्हाधिकारी मनुज जिंदल म्हणाले की, देवस्थानांच्या जमिनींसंदर्भात माहिती घेण्याचे काम सुरू आहे. मंदिरांच्या जमिनी, देवराई यांच्या संदर्भात तुमच्या काही सूचना असतील तर त्या आम्हाला सांगा. मंदिर विश्वस्तांच्या भावना आम्ही निश्चितपणे शासनापर्यंत पोहोचवू.

---------------

हिंदुस्थान समाचार / रत्नागिरी