रायगड, 24 नोव्हेंबर (हिं.स.)। प्रभाग क्रमांक 2 मध्ये परिवर्तन विकास आघाडीने आयोजित केलेली कॉर्नर सभा उत्साहात पार पडली. सभा सुरू होताच परिसरात झालेली जनतेची मोठी गर्दी आणि उपस्थितांचा उत्स्फूर्त प्रतिसाद यामुळे संपूर्ण वातावरण निवडणूक लढतीच्या रंगात न्हाऊन निघाले. आघाडीचे प्रमुख नेते नितीन दादा सावंत आणि सुधाकर भाऊ घारे यांच्या दमदार भाषणांनी सभेला विशेष उर्जा प्राप्त झाली.

सभेची सुरुवात होताच स्थानिक तरुण व कार्यकर्त्यांनी घोषणाबाजी करत उमेदवारांच्या समर्थनार्थ जोरदार उपस्थिती दर्शवली. प्रभागातील विविध प्रश्न, विकासकामांची गरज आणि नागरिकांच्या अपेक्षा या विषयांवर नेत्यांनी थेट संवाद साधला. नितीन दादा सावंत यांनी परिवर्तन विकास आघाडीने केलेल्या कामांचा आढावा घेत पुढील पाच वर्षांत प्रभाग 2 चा सर्वांगीण विकास करण्याचे आश्वासन दिले. तर सुधाकर भाऊ घारे यांनी शहरातील नागरिकांना भेडसावणाऱ्या मूलभूत सुविधांच्या प्रश्नांचा कठोर पद्धतीने उल्लेख करत सध्याच्या सत्ताधाऱ्यांवर जोरदार टीका केली.

यावेळी हर्षल मोरे यांनीही प्रभावी भाषण करत तरुणांना विकासाच्या प्रवाहात पुढे येण्याचे आवाहन केले. प्रभाग 2 मधील बेरोजगारी, रस्त्यांची दुरवस्था, पाणीपुरवठ्याच्या समस्या आणि नागरिकांच्या सुरक्षेचे मुद्दे ठळकपणे मांडत मोरे यांनी आघाडीचा स्पष्ट विकासदृष्टीकोन जनतेसमोर ठेवला. त्यांच्या वक्तव्यांना उपस्थितांकडून प्रचंड प्रतिसाद मिळाला.सभेला स्थानिक नागरिक, महिला आणि तरुण वर्गाची मोठ्या प्रमाणावर उपस्थिती होती. आघाडीच्या नेत्यांच्या भाषणांनी सभेचा जोश वाढवला असून, प्रभाग 2 मधील निवडणूक वातावरण अधिक तापले आहे. परिवर्तन विकास आघाडीची ही शक्तिप्रदर्शन सभा निवडणुकीपूर्वी निर्णायक मानली जात आहे.

--------------

हिंदुस्थान समाचार / संदेश साळुंके