अंकारा, 9 नोव्हेंबर (हिं.स.)। तुर्कीचे राष्ट्रपती रेसेप तैय्यप एर्दोगन यांनी जाहीर केले आहे की तुर्कीचे परराष्ट्र व संरक्षण मंत्री तसेच गुप्तचर प्रमुख या आठवड्यात पाकिस्तानला भेट देणार आहेत, जेणेकरून दक्षिण आशियातील अफगाणिस्तानसोबत चालू असलेल्या युद्धविराम (सीजफायर) चर्चेवर चर्चा करता येईल.

रविवारी जारी करण्यात आलेल्या अधिकृत निवेदनानुसार, बाकू येथे पाकिस्तानचे पंतप्रधान शहबाज शरीफ यांच्याशी भेटल्यानंतर एर्दोगन म्हणाले की या त्रिपक्षीय भेटीचा उद्देश दोन्ही देशांमध्ये लवकरात लवकर ठोस युद्धविराम आणि शाश्वत शांतता प्रस्थापित करणे आहे.

तुर्कीचे राष्ट्रपती एर्दोगन यांनी शनिवारी बाकूमध्ये पंतप्रधान शहबाज शरीफ यांची भेट घेतली आणि आशा व्यक्त केली की या चर्चांमुळे “दीर्घकालीन स्थैर्याकडे वाटचाल होईल.” त्यांच्या कार्यालयातून जारी निवेदनानुसार, तुर्की दोन्ही पक्षांमधील संवाद सुलभ करण्यास कटिबद्ध आहे, असे त्यांनी पुन्हा अधोरेखित केले.

यापूर्वी तालिबानने शनिवारी पुष्टी केली होती अफगाणिस्तान आणि पाकिस्तानमधील शांतता चर्चा अपयशी ठरली आहे, मात्र दोन्ही देशांमधील युद्धविराम अद्याप लागू आहे. तालिबानचे प्रवक्ते जबीहुल्लाह मुजाहिद यांनी सांगितले की, चर्चा तुटली कारण इस्लामाबादने काबुलला पाकिस्तानच्या अंतर्गत सुरक्षेची जबाबदारी घ्यावी अशी मागणी केली होती, जी अफगाणिस्तानच्या क्षमतेबाहेर आहे. मुजाहिद पुढे म्हणाले, “जो युद्धविराम झाला आहे, तो आम्ही अजूनपर्यंत मोडलेला नाही आणि आम्ही त्याचे पालन करत राहू.”

दरम्यान, पाकिस्तानचे संरक्षणमंत्री ख्वाजा मुहम्मद आसिफ यांनी शुक्रवारी सांगितले की सीमेवरील चकमकी रोखण्यासाठी इस्तंबूलमध्ये झालेली शांतता चर्चा निष्फळ ठरली आहे. त्यांनी स्पष्ट केले की युद्धविराम तोपर्यंत लागू राहील, जोपर्यंत अफगाणिस्तानच्या भूभागातून हल्ले होत नाहीत.

---------------

हिंदुस्थान समाचार / Priyanka Bansode