अमरावती, 17 डिसेंबर (हिं.स.)।
नकली नोटा चलनात आणण्याच्या गंभीर प्रकरणात अमरावती जिल्हा व सत्र न्यायालयाने आरोपीला दोषी ठरवत शिक्षा सुनावली आहे. अभियोजन पक्षातर्फे सहाय्यक सरकारी अभियोक्ता ॲड. दिलीप डी. तिवारी यांनी प्रभावी युक्तिवाद केला.हे प्रकरण सिटी कोतवाली पोलीस ठाणे, अमरावती अंतर्गत नोंद असलेल्या गुन्हा क्रमांक 22/2024 शी संबंधित आहे. अभियोजन पक्षाच्या माहितीनुसार, दिनांक 12 जानेवारी 2024 रोजी सिटी कोतवाली हद्दीतील के. एस. जायस्वाल देशी दारू दुकान, वापट चौक, अमरावती येथे आरोपीने नकली नोट चलनात आणण्याचा प्रयत्न केला होता. तक्रारदाराने दिलेल्या नोटची तपासणी केली असता ती नकली असल्याचे निष्पन्न झाले, त्यानंतर तात्काळ पोलिसांना माहिती देण्यात आली.पोलीस तपासात आरोपीची ओळख अर्शीद खान राशिद खान (वय 48 वर्षे), रा. मदरसावाला दर्गा, हेलापुरा, अमरावती अशी झाली. सिटी कोतवाली पोलिसांनी आरोपीला ताब्यात घेऊन झडती घेतली असता त्याच्याकडून 200 रुपयांच्या नकली नोटा जप्त करण्यात आल्या. तपासात नोटांवर “इंडिया एक्झामिन बँक” असे दिशाभूल करणारे शब्द छापलेले असल्याचे आढळून आले, ज्यामुळे त्या नकली असल्याची पुष्टी झाली.प्रकरणाची सुनावणी पूर्ण झाल्यानंतर न्यायालयाने आरोपीला भारतीय दंड संहितेच्या कलम 489(ख) व 489(क) अंतर्गत दोषी ठरवले. न्यायालयाने कलम 489(ख) अंतर्गत 7 वर्षांची सश्रम कारावासाची शिक्षा व 2,000 रुपये दंड तसेच कलम 489(क) अंतर्गत 20 वर्षांपर्यंत सश्रम कारावासाची शिक्षा व 4,000 रुपये दंड ठोठावला. दंड न भरल्यास अतिरिक्त कारावास भोगण्याचे आदेशही न्यायालयाने दिले.या प्रकरणात अभियोजन पक्षातर्फे सहाय्यक सरकारी अभियोक्ता ॲड. दिलीप डी. तिवारी यांनी प्रभावी बाजू मांडली. प्रकरणाचा तपास पीएसआय विजय चव्हाण यांनी केला.
---------------
हिंदुस्थान समाचार / अरुण जोशी
