अल्बेनी, 18 डिसेंबर (हिं.स.)।संयुक्त राष्ट्रांचे महासचिव अँटोनियो गुटेरेस यांनी अमेरिका आणि व्हेनेझुएला यांच्यात वाढत चाललेल्या तणावाच्या पार्श्वभूमीवर दोन्ही देशांनी संयम राखावा, असे आवाहन केले आहे. संयुक्त राष्ट्रांनी अमेरिका आणि व्हेनेझुएलाला आंतरराष्ट्रीय कायद्याचा आदर करण्याचे आवाहनही केले आहे. ही अपील अशा वेळी करण्यात आली आहे, जेव्हा व्हेनेझुएलाचे राष्ट्राध्यक्ष निकोलस मादुरो यांनी संयुक्त राष्ट्र महासचिवांना फोन करून प्रादेशिक तणावाबाबत चर्चा केली आणि संयम राखण्याची विनंती केली.

गुटेरेस यांच्या कार्यालयाकडून जारी करण्यात आलेल्या निवेदनात म्हटले आहे की, “महासचिवांना व्हेनेझुएलाचे राष्ट्राध्यक्ष निकोलस मादुरो यांचा फोन आला, ज्यामध्ये सध्याच्या प्रादेशिक तणावावर चर्चा करण्यात आली.” पुढे असेही नमूद करण्यात आले आहे की, “या दूरध्वनी संभाषणादरम्यान महासचिवांनी सदस्य राष्ट्रांनी आंतरराष्ट्रीय कायद्याचा, विशेषतः संयुक्त राष्ट्रांच्या सनदेचा आदर करावा, संयम बाळगावा आणि प्रादेशिक स्थैर्य राखण्यासाठी तणाव कमी करण्याची गरज आहे, या संयुक्त राष्ट्रांच्या भूमिकेची पुनःपुष्टी केली.”

माध्यमांच्या वृत्तानुसार, मादुरो यांनी एका निवेदनात म्हटले की अमेरिकेचे राष्ट्राध्यक्ष डोनाल्ड ट्रम्प यांनी व्हेनेझुएलाबाबतचे आपले खरे हेतू उघड केले आहेत. ट्रम्प यांनी दावा केला आहे की व्हेनेझुएलाने अमेरिकेचे तेल, जमीन आणि इतर मालमत्ता चोरली आहे. मादुरो म्हणाले की ट्रम्प यांच्या दाव्यांवरून अमेरिका प्रत्यक्षात व्हेनेझुएलाच्या भूभाग आणि संसाधनांवर ताबा मिळवून तेथे सत्ताबदल घडवून आणू इच्छित आहे, हे स्पष्ट होते.

यापूर्वी अमेरिकेने व्हेनेझुएलाच्या जवळ नौदल तैनात करण्यामागचे कारण अमली पदार्थांच्या तस्करीविरोधातील लढा असल्याचे सांगितले होते. मात्र मादुरो यांनी याला विरोध करत म्हटले, “हे फक्त युद्ध भडकवणारे आणि वसाहतवादी निमित्त आहे. आम्ही हे अनेक वेळा सांगितले आहे आणि आता सर्वांनाच सत्य दिसत आहे. सत्य समोर आले आहे.” मादुरो यांनी आरोप केला की, “व्हेनेझुएलामध्ये सत्ताबदल करून एक कठपुतळी सरकार बसवण्याचे लक्ष्य आहे, जे ४७ तासही टिकणार नाही. असे सरकार संविधान, सार्वभौमत्व आणि सर्व मालमत्ता सोपवेल आणि व्हेनेझुएलाला पुन्हा वसाहत बनवेल. पण असे कधीही होणार नाही.”

मंगळवारी ट्रम्प यांनी ‘ट्रुथ सोशल’वर लिहिले की, “व्हेनेझुएलाच्या आसपासची लष्करी तैनाती तोपर्यंत वाढवली जाईल, जोपर्यंत व्हेनेझुएला अमेरिकेला त्यांनी आधी चोरलेले तेल, जमीन आणि इतर मालमत्ता परत करत नाही.” माध्यमांशी बोलताना ट्रम्प म्हणाले की व्हेनेझुएलाने बेकायदेशीररीत्या ऊर्जा हक्क ताब्यात घेतले असून अमेरिका ते परत मिळवू इच्छिते. ते म्हणाले, “आम्हाला जमीन, तेलाचे हक्क आणि जे काही आमचे होते ते सर्व परत मिळत आहे, जे त्यांनी आमच्याकडून हिसकावून घेतले होते. कदाचित आमचे मागील राष्ट्राध्यक्ष याकडे लक्ष देत नव्हते, पण आता तसे होणार नाही. आम्हाला ते सर्व परत हवे आहे. त्यांनी आमच्या कंपन्यांना देशाबाहेर काढले होते आणि आम्हाला ते परत हवे आहे.”

अमेरिकन माध्यमांच्या वृत्तानुसार, १९७०च्या दशकात व्हेनेझुएलाने आपल्या तेल क्षेत्रावर सरकारी नियंत्रण आणले होते. त्यापूर्वी व्हेनेझुएलाच्या तेल क्षेत्रात अमेरिकन कंपन्यांची मोठ्या प्रमाणावर उपस्थिती होती.

---------------

हिंदुस्थान समाचार / Priyanka Bansode