बीजिंग, 18 डिसेंबर (हिं.स.)।गुरुवारी चीनमध्ये दाट धुके पसरले असून त्यामुळे देशातील अनेक भागांमध्ये वायू गुणवत्ता निर्देशांक अत्यंत खराब पातळीवर पोहोचला आहे. उल्लेखनीय बाब म्हणजे, चीनने अब्जावधी डॉलर्स खर्च करून आणि अनेक वर्षांच्या प्रयत्नांनंतर वायू प्रदूषणाची समस्या मोठ्या प्रमाणावर नियंत्रणात आणली होती. मात्र गुरुवारी, या सर्व प्रयत्नांनंतरही चीनला पुन्हा वायू प्रदूषणाचा सामना करावा लागला.

चीनच्या राष्ट्रीय वेधशाळेने बुधवारी देशातील काही भागांमध्ये दाट धुक्यामुळे ‘येलो अलर्ट’ जारी केला होता. या इशाऱ्यात असे सांगण्यात आले होते की गुरुवारी हेबेई, बीजिंग, तियानजिन, हेनान, अनहुई, जियांगसू, हुबेई, सिचुआन बेसिन आणि चोंगकिंगच्या काही भागांमध्ये दाट धुके राहण्याची शक्यता आहे.सध्या चीनमध्ये वायू प्रदूषण आणि धुक्याची समस्या तुलनेने दुर्मिळ मानली जाते, कारण चीन सरकारने २०१६ साली वायू प्रदूषण कमी करण्यासाठी अनेक मोठी पावले उचलली होती. यामध्ये मोठ्या प्रमाणावर प्रदूषण करणारे उद्योग बंद करणे किंवा त्यांचे स्थलांतर करणे यासह अनेक उपाययोजना करण्यात आल्या आणि यासाठी अब्जावधी डॉलर्स खर्च करण्यात आले.अधिकाऱ्यांच्या मते, शहरांमध्ये हिवाळ्यात कोळशावर चालणाऱ्या हीटिंग प्रणालींच्या जागी नैसर्गिक वायूवर आधारित किंवा विद्युत सार्वजनिक हीटिंग प्रणाली स्वीकारल्यामुळे प्रदूषणाच्या पातळीत लक्षणीय घट झाली आहे.

नवी दिल्लीत वाढत चाललेल्या प्रदूषण संकटामुळे चीनने या समस्येला तोंड देण्यासाठी केलेले प्रयत्न सध्या चर्चेत आहेत. मात्र गुरुवारी चीनमध्येही वायू गुणवत्ता अत्यंत खराब राहिल्याने या प्रतिमेला धक्का बसला. चीनच्या पर्यावरण विभागाचे प्रमुख चेन तियान यांनी सांगितले की, गेल्या पाच वर्षांत चीनने पर्यावरणाच्या दिशेने महत्त्वपूर्ण सुधारणा केल्या आहेत. याचा परिणाम म्हणून बीजिंगमध्ये पक्ष्यांची संख्या वाढली असून अनेक दुर्मिळ पक्षी आता चीनमध्ये पाहायला मिळत आहेत.

---------------

हिंदुस्थान समाचार / Priyanka Bansode