मुंबई, 24 डिसेंबर (हिं.स.)। वियतनामी इलेक्ट्रिक वाहन निर्माता विनफास्टने सप्टेंबर 2025 मध्ये भारतीय बाजारात अधिकृत प्रवेश केला होता. कंपनीने सुरुवातीला VinFast VF6 आणि VF7 या दोन इलेक्ट्रिक SUVs सादर केल्या असून, या दोन्ही गाड्यांचे उत्पादन तमिळनाडूतील कंपनीच्या प्लांटमध्ये केले जात आहे. आता 2026 साठी विनफास्टने आपल्या भारतीय पोर्टफोलिओचा विस्तार करण्याची घोषणा केली असून, यात दोन नव्या इलेक्ट्रिक मॉडेल्सचा समावेश असणार आहे. या गाड्या म्हणजे VinFast Limo Green थ्री-रो इलेक्ट्रिक MPV आणि VinFast VF3 मायक्रो EV.
VinFast Limo Green ही कंपनीची भारतातील पहिली थ्री-रो इलेक्ट्रिक MPV असणार आहे. कंपनी तिला पूर्ण 7-सीटर न म्हणता 5+2 कॉन्फिगरेशनमध्ये मांडत असली, तरीही ही कार थ्री-रो EV सेगमेंटमध्ये उतरणार आहे. लॉन्चनंतर तिचा थेट मुकाबला BYD eMax 7 सोबत होण्याची शक्यता आहे. VinFast Limo Green मध्ये 60.1kWh क्षमतेचा बॅटरी पॅक देण्यात येणार असून, कंपनीच्या दाव्यानुसार ही कार सुमारे 450 किलोमीटरची रेंज देईल. या MPV मध्ये फ्रंट-माउंटेड इलेक्ट्रिक मोटर देण्यात येईल, जी 201hp इतकी पावर जनरेट करेल.
डिझाइनच्या बाबतीत Limo Green मध्ये विनफास्टच्या ओळखीच्या V-लँप सिग्नेचरचा वापर पुढील आणि मागील बाजूस करण्यात आला आहे. साइड प्रोफाइल पाहिल्यास उंचावलेली रूफलाईन दिसते, जी काहीशी Tata Safari ची आठवण करून देते. इंटीरियरमध्ये विनफास्टचा मिनिमलिस्ट अप्रोच कायम ठेवण्यात आला असून, बहुतांश फंक्शन्स कंट्रोल करण्यासाठी मोठा सेंटर टचस्क्रीन दिला जाण्याची शक्यता आहे. VinFast Limo Green ची अंदाजित किंमत 22 लाख ते 26 लाख रुपयांच्या दरम्यान असू शकते आणि ही कार 2026 च्या पहिल्या तिमाहीत भारतीय बाजारात लॉन्च होऊ शकते.
दुसरीकडे, विनफास्ट VF3 ही कंपनीची मायक्रो EV असणार असून, ती मुख्यत्वे शहरी वापरासाठी डिझाइन करण्यात आली आहे. MG Motor च्या MG Comet EV ने भारतात चांगला प्रतिसाद मिळवल्यानंतर विनफास्ट देखील या मायक्रो EV सेगमेंटमध्ये आपली संधी साधण्याच्या तयारीत आहे. VF3 चे कॉम्पॅक्ट आकारमान शहरातील गर्दीच्या ट्रॅफिकमध्ये चालवण्यासाठी उपयुक्त ठरेल. विशेष म्हणजे, या छोट्या इलेक्ट्रिक कारला 191mm इतका ग्राउंड क्लीयरेंस देण्यात आला आहे, जो खराब रस्त्यांवर चालवताना मदत करेल.
विनफास्ट VF3 मध्ये 18.6kWh क्षमतेची बॅटरी देण्यात येणार असून, तिची क्लेम्ड रेंज 200 किलोमीटरपेक्षा जास्त असल्याचे सांगितले जात आहे. ही रेंज शहरात रोजच्या ऑफिस ये-जा साठी एका आठवड्यापर्यंत पुरेशी ठरू शकते. या कारमध्ये 43.5hp क्षमतेची इलेक्ट्रिक मोटर दिली जाणार आहे. जरी पावर आकडा फार मोठा नसला, तरी कमी वजन आणि कॉम्पॅक्ट डिझाइनमुळे VF3 शहरातील वापरासाठी योग्य ठरेल. MG Motor प्रमाणेच VinFast देखील भारतात बॅटरी-एज-ए-सर्व्हिस (BaaS) मॉडेल देण्याचा विचार करत आहे. विनफास्ट VF3 ही कार 2026 च्या पहिल्या सहामाहीत लॉन्च होण्याची शक्यता असून, तिची अंदाजित किंमत 8 लाख ते 10 लाख रुपयांच्या दरम्यान असू शकते.
या दोन नव्या मॉडेल्समुळे विनफास्टचा भारतीय इलेक्ट्रिक वाहन बाजारातील दबदबा वाढण्याची शक्यता आहे आणि कंपनी वेगवेगळ्या सेगमेंटमध्ये ग्राहकांना आकर्षित करण्याचा प्रयत्न करत असल्याचे स्पष्ट होते.
---------------
हिंदुस्थान समाचार / Suraj Chaugule
