मुंबई, 29 डिसेंबर (हिं.स.) : भारतातील सुवर्णालंकारांच्या क्षेत्रातील प्रतिष्ठित नाव असलेल्या पीएनजी ज्वेलर्सने आपल्या 'लाइटस्टाईल बाय पीएनजी' या समकालीन ब्रँडच्या विस्तारासाठी मोठी घोषणा केली आहे. या आधुनिक आणि हलक्या वजनाच्या दागिन्यांच्या ब्रँडने प्रसिद्ध युवा आयकॉन सारा तेंडुलकरला आपली नवीन ब्रँड अॅम्बेसेडर म्हणून नियुक्त केले असून, या माध्यमातून ब्रँडने तरुण पिढीशी नाते अधिक घट्ट करण्याच्या दिशेने पाऊल टाकले आहे.

​जवळपास दोनशे वर्षांची परंपरा असलेल्या पीएनजी ज्वेलर्सने बदलत्या काळानुसार आपली ओळख जपतानाच भविष्यातील ग्राहकांसाठी 'लाइटस्टाईल' ही स्वतंत्र ओळख निर्माण केली आहे.

पीएनजी ज्वेलर्सचे अध्यक्ष आणि व्यवस्थापकीय संचालक डॉ. सौरभ गाडगीळ यांनी या महत्त्वपूर्ण बदलावर भाष्य करताना सांगितले की, 'लाइटस्टाईल' ही केवळ तात्पुरती फॅशन नसून तो पीएनजी अंतर्गत एक जाणीवपूर्वक उभारलेला स्वतंत्र ब्रँड आहे. आजच्या तरुण पिढीची खरेदी करण्याची पद्धत आणि त्यांची अभिव्यक्ती पूर्णपणे वेगळी असून, त्यांना दैनंदिन जीवनात वापरता येतील असे समकालीन डिझाइन्स देण्याचा आमचा प्रयत्न आहे. पुण्यात आणि गोव्यात या स्टोअर्सना मिळालेल्या प्रचंड प्रतिसादानंतर आता आम्ही हा ब्रँड राष्ट्रीय स्तरावर नेण्यास सज्ज आहोत.

​सारा तेंडुलकरची निवड करण्यामागे तिची साधी आणि तितकीच आधुनिक जीवनशैली हे मुख्य कारण आहे. सोशल मीडियावर कोट्यवधींच्या पसंतीस उतरलेली सारा आता या ब्रँडच्या विविध जाहिरात मोहिमा, डिजिटल उपक्रम आणि स्टोअर लॉन्चिंगमध्ये सक्रिय सहभाग नोंदवणार आहे.

या सहयोगाबद्दल आनंद व्यक्त करताना साराने म्हटले की, 'लाइटस्टाईल'ची ज्वेलरी ही नैसर्गिक सहजता प्रतिबिंबित करते, जी माझ्या वैयक्तिक स्टाईलशी पूर्णपणे जुळणारी आहे. दरम्यान, पीएनजी ज्वेलर्सने आपल्या विस्ताराचा आराखडाही स्पष्ट केला असून, आर्थिक वर्ष २०२८ पर्यंत महाराष्ट्र आणि देशाच्या इतर भागांत एकूण ५० नवी स्टोअर्स उघडण्याचे त्यांचे उद्दिष्ट आहे. सारा तेंडुलकरचा समावेश असलेले विशेष कलेक्शन मार्च २०२६ पासून ग्राहकांसाठी उपलब्ध होणार असून, यामुळे दागिन्यांच्या बाजारात एक नवा ट्रेंड निर्माण होण्याची शक्यता वर्तवली जात आहे.

---------------

हिंदुस्थान समाचार / सुधांशू जोशी