रायगड, 30 डिसेंबर, (हिं.स.)। नुकताच श्रीवर्धन येथे चॅम्पियन कराटे क्लब रायगडच्या वतीने “शिव छत्रपती राज्य स्तरीय कराटे स्पर्धा २०२५” चे आयोजन करण्यात आले. राज्यातील आठ जिल्ह्यांमधून एकूण १५० हून अधिक स्पर्धकांनी या स्पर्धेत सहभाग नोंदविला, ज्यामुळे संपूर्ण कार्यक्रम क्रीडाप्रेमींसाठी उत्साहवर्धक ठरला.

ही स्पर्धा श्रीवर्धन येथील कुणबी समाज सभागृहात आयोजित करण्यात आली होती. रायगडचे प्रतिनिधित्व करताना श्रीवर्धन टिमने उत्कृष्ट कामगिरी करत सर्वोत्कृष्ट टिम म्हणून नाव नोंदवले. मान्यवरांच्या हस्ते शिव छत्रपती चषक देऊन या टिमला सन्मानित करण्यात आले.

स्पर्धेचे आयोजन क्लबचे सिहान संतोष मोहीत यांच्या प्रमुख मार्गदर्शनाखाली करण्यात आले. मुख्य प्रशिक्षक अविनाश मोरे, प्रसाद विचारे, रितेश मुरकर, अनिकेत साखरे व अभय कलमकर यांनी उत्तम नियोजन करून स्पर्धा यशस्वी केली. त्यांच्या मेहनतीमुळे स्पर्धकांना सर्वोत्तम प्रशिक्षण आणि योग्य स्पर्धात्मक वातावरण मिळाले.

स्पर्धकांनी विविध कराटे फॉर्म्स आणि कुमीते स्पर्धांमध्ये उत्कृष्ट प्रदर्शन केले. स्थानिक तसेच राज्यस्तरीय प्रशिक्षकांनी कौतुक करत शिस्तबद्ध आणि उत्साही प्रदर्शनाचे महत्त्व अधोरेखित केले. क्लबच्या वतीने सांगण्यात आले की, ही राज्यस्तरीय स्पर्धा भविष्यातील राज्यस्तर व देशस्तरीय कराटे स्पर्धांच्या तयारीसाठी महत्त्वाची ठरणार आहे. स्पर्धकांना येथे मिळालेले अनुभव आणि मार्गदर्शन त्यांच्या पुढील कारकिर्दीसाठी प्रेरणादायी ठरेल, असेही क्लबने नमूद केले.

या स्पर्धेतून श्रीवर्धनमधील युवा कराटेपटूंचा उत्साह आणि क्षमता उघडून दिसली, ज्यामुळे स्थानिक क्रीडासंस्कृतीला मोठा बळ मिळाले आहे.

---------------

हिंदुस्थान समाचार / संदेश साळुंके