छत्रपती संभाजीनगर, 13 जानेवारी, (हिं.स.)। छत्रपती संभाजी नगर महानगरपालिकेच्या निवडणुकीत आपण एकाच ठिकाणी मतदान करणार आहोत, असे हमीपत्र तेरा हजार दुबार मतदारांना त्या मतदान केंद्राध्यक्षांना द्यावे लागणार आहे. महापालिका निवडणुकीसाठीची मतदार यादी विधानसभा निवडणुकीसाठीची मतदार यादी गृहीत धरून तयार करण्यात आली आहे. विधानसभा मतदारसंघाची मतदार यादी प्रभागनिहाय तोडून त्या त्या प्रभागाची यादी तयार करण्यात आली आहे. विधानसभेच्या मतदार यादीवरून तयार करण्यात आलेल्या प्रभागांच्या मतदार यादींमध्ये ५८ हजार दुबार मतदार असल्याचे त्या वेळी प्रशासनाकडून सांगण्यात आले. , 'त्या ५८ हजार दुबार मतदारांची तपासणी केली असता दुबार मतदारांची संख्या १३ हजार आहे असे स्पष्ट झाले. या दुबार मतदारांना त्या त्या मतदान केंद्रावर जाऊन मतदान करता येईल; पण मतदान करण्यापूर्वी त्यांना संबंधित मतदान केंद्राध्यक्षांना हमी पत्र लिहून द्यावे लागणार आहे. 'आपण एकाच ठिकाणी मतदान करणार आहोत,' असे ते हमी पत्र असून, त्यावर त्या मतदाराला स्वाक्षरी करावी लागेल. हमीपत्र तयार केले असेल त्यावर त्या मतदाराचे नाव, मतदार यादीमधील क्रमांक आणि प्रभाग क्रमांक ही माहिती भरून स्वाक्षरी करावी.' ज्या मतदान केंद्रावर सायंकाळी साडेपाचच्या नंतर मतदान सुरू राहील. वीजपुरवठ्यासह अन्य व्यवस्था करण्यात आली आहे. साडेपाच वाजेपर्यंत मतदान केंद्रात उपस्थित असलेल्या मतदारांना मतदान केंद्राध्यक्ष टोकन देतील, असेही सांगण्यात आले.

---------------

हिंदुस्थान समाचार / Hanumant Madanrao Chitnis