छत्रपती संभाजीनगर, 04 जानेवारी (हिं.स.)। भारतीय जनता पार्टी मध्यवर्ती प्रचार कार्यालय येथे छत्रपती संभाजीनगर मनपा निवडणुकीच्या पार्श्वभूमीवर पक्षाच्या वतीने नेमण्यात आलेल्या प्रभारी पदाधिकाऱ्यांची अत्यंत महत्त्वपूर्ण बैठक संपन्न झाली. राज्याचे मंत्री अतुल सावे खासदार डॉक्टर भागवत कराड यांच्यासह छत्रपती संभाजीनगर जिल्ह्यातील भारतीय जनता पक्षाचे नेते पदाधिकारी मोठ्या संख्येने उपस्थित होते.

या बैठकीत प्रत्येक प्रभागातील राजकीय परिस्थिती, मतदारांचे कल, संघटनात्मक मजबुती, बूथस्तरीय व्यवस्थापन तसेच विजयासाठी आवश्यक असलेली रणनिती यावर सखोल चर्चा करण्यात आली. निवडणूक केवळ लढायची नाही तर जिंकायचीच या ठाम निर्धाराने पक्षाची पुढील वाटचाल ठरवण्यात आली.

महानगरपालिका निवडणुकीत भारतीय जनता पार्टीचा झेंडा फडकवण्यासाठी प्रत्येक प्रभारी यांना स्पष्ट जबाबदाऱ्या देण्यात आल्या आहेत. नियोजनबद्ध कामकाज, समन्वय आणि कार्यकर्त्यांची ताकद या त्रिसूत्रीवर विजयाचा अचूक हिशोब मांडण्यात आला. या बैठकीतून भारतीय जनता पार्टी छत्रपती संभाजीनगर मनपा निवडणुकीस पूर्ण तयारीसह उतरलेली असून, शहरात विकास, सुशासन आणि जनतेच्या हितासाठी पक्षाने ठाम संकल्प व्यक्त केला आहे.

------------

हिंदुस्थान समाचार / Hanumant Madanrao Chitnis