नवी दिल्ली , 25 फेब्रुवारी (हिं.स.)। एआय समिटमधील प्रदर्शनात भारतीय युवक काँग्रेस (आयवायसी) कार्यकर्त्यांनी शर्टलेस आंदोलन केल्यानंतर काँग्रेस आणि भाजपामध्ये शब्दयुद्ध सुरू झाले आहे. या पार्श्वभूमीवर केंद्रीय वाणिज्य व उद्योग मंत्री पीयूष गोयल यांनी बुधवारी काँग्रेस नेते राहुल गांधी यांच्यावर तीव्र टीका करत देशाचे पहिले पंतप्रधान जवाहरलाल नेहरू आणि पाकिस्तानच्या ताब्यातील काश्मीरचाही उल्लेख केला.
पीयूष गोयल म्हणाले की, आज सकाळी भाजपाचे राष्ट्रीय अध्यक्ष पटण्यात पत्रकार परिषदेत सांगत होते की गांधी कुटुंब हे तडजोड करणारे राजकीय कुटुंब आहे. राहुल गांधी आणि त्यांची काँग्रेस ही तडजोडीवर चालणारी राजकीय परंपरा आहे.ते पुढे म्हणाले, काँग्रेस पक्षाचा इतिहास पाहिला तरी किंवा वर्तमान परिस्थिती पाहिली तरी, तसेच त्यांच्या विविध भ्रष्टाचाराच्या प्रकरणांकडे पाहिले तरी स्पष्ट होते की ते परकीय शक्तींच्या प्रभावाखाली जनहित आणि राष्ट्रहिताशी तडजोड करतात. देश आणि देशवासियांच्या उज्ज्वल भवितव्याशीही त्यांनी वारंवार तडजोड केली आहे. याची अनेक उदाहरणे देशासमोर आहेत.
गोयल यांनी आरोप केला की राहुल गांधी नकारात्मक राजकारणाचे पोस्टर बॉय बनले आहेत. ते २४७ वेळा परदेश दौऱ्यावर गेले, प्रोटोकॉलकडे दुर्लक्ष केले आणि देशहिताशी तडजोड केली. सीमावर्ती संवेदनशील प्रदेश लडाख येथे त्यांच्या भेटींचाही त्यांनी उल्लेख केला. तसेच साकिर मिरालीसारख्या भारतविरोधी व्यक्तींशी संबंध असल्याचा आरोपही त्यांनी केला. देशातील जनतेला राहुल गांधी कोणत्या प्रकारचे राजकारण करत आहेत, हे आता स्पष्ट झाले आहे, असेही ते म्हणाले.
गोयल पुढे म्हणाले की केवळ सोनिया गांधी आणि राहुल गांधी यांनीच नव्हे, तर जवाहरलाल नेहरू, इंदिरा गांधी आणि राजीव गांधी यांनीही देशाशी तडजोड केली. १९७१ मध्ये झालेल्या शिमला करारानंतर ९३ हजार पाकिस्तानी सैनिकांना सोडण्यात आले, हा कोणत्या शक्तींचा दबाव होता? इंदिरा गांधी यांनी देशाशी तडजोड केली, असा आरोप त्यांनी केला. काँग्रेस आणि संपूर्ण नेहरू-गांधी कुटुंबाने कायम देशहिताशी तडजोड केल्याचा आरोप त्यांनी केला.
भारत-अमेरिका व्यापार कराराच्या विरोधात मध्य प्रदेशची राजधानी भोपाळ येथील जवाहर चौकात आयोजित ‘किसान महाचौपाल’ कार्यक्रमात राहुल गांधी यांनी सरकारवर जोरदार टीका केली. त्यांनी आरोप केला की पंतप्रधान नरेंद्र मोदी यांनी आंतरराष्ट्रीय कराराद्वारे देशातील शेतकऱ्यांच्या हिताशी तडजोड केली. राहुल गांधी म्हणाले की हा करार चार महिने प्रलंबित होता आणि कृषी विषयांवरील चर्चा ठप्प होती. या काळात संबंधित मंत्र्यांशी चर्चा न करता अचानक निर्णय घेण्यात आला, असा आरोप त्यांनी केला.
त्यांनी असेही म्हटले की सरकारला अमेरिकेतील मोठ्या कंपन्यांना सोयाबीन, कापूस आणि मका यांसारखी कृषी उत्पादने भारतात विक्री करण्याची परवानगी द्यायची नव्हती, कारण त्यामुळे भारतीय शेतकऱ्यांचे नुकसान होऊ शकते. मात्र त्यांच्या भाषणानंतर पंतप्रधानांनी कॅबिनेटशी चर्चा न करता अमेरिकेचे तत्कालीन राष्ट्राध्यक्ष डोनाल्ड ट्रम्प यांना फोन करून कराराला मान्यता दिली, असा दावा त्यांनी केला.राहुल गांधी यांनी पंतप्रधान नरेंद्र मोदी यांच्यावर टीका करताना म्हटले की त्यांनी देशातील शेतकऱ्यांना कमकुवत केले आणि त्यांचा डेटा बाहेर दिला. तसेच सरकारच्या धोरणांमुळे वस्त्रोद्योगालाही फटका बसल्याचा आरोप त्यांनी केला.
---------------
हिंदुस्थान समाचार / Priyanka Bansode
