मुंबई, 13 मार्च (हिं.स.)। विलेपार्ले येथील साठये महाविद्यालयाच्या परिसरात येत्या 28 आणि 29 मार्च 2026 रोजी ‘साठये करिअर कॉन्क्लेव्ह 2026’ चे आयोजन करण्यात येणार आहे. विद्यार्थ्यांना करिअर जागरूकता, शैक्षणिक मार्गदर्शन आणि व्यावसायिक संधी उपलब्ध करून देण्यासाठी तसेच नामांकित शैक्षणिक संस्था, उद्योगक्षेत्रातील तज्ज्ञ आणि नियोक्ते यांच्याशी थेट संवाद साधण्याची संधी देण्यासाठी हा उपक्रम आयोजित करण्यात येत आहे.

साठये करिअर कॉन्क्लेव्ह 2026 मध्ये शाळा व महाविद्यालयांमधील 10,000 हून अधिक विद्यार्थ्यांचा सहभाग अपेक्षित असून, विद्यार्थ्यांसाठी आयोजित करण्यात येणाऱ्या अशा प्रकारच्या उपक्रमांपैकी हा एक मोठा उपक्रम ठरणार आहे. शालेय आणि महाविद्यालयीन विद्यार्थ्यांसाठी विशेषतः रचलेल्या या कॉन्क्लेव्हद्वारे विद्यार्थ्यांना विविध शैक्षणिक शाखांची माहिती, करिअरविषयक स्पष्टता आणि वेगाने बदलणाऱ्या जागतिक परिस्थितीत उपलब्ध होत असलेल्या नव्या व्यावसायिक संधींबाबत माहिती मिळणार आहे.

इयत्ता नववी आणि दहावीतील विद्यार्थ्यांना विविध शैक्षणिक प्रवाह आणि भविष्यातील करिअरच्या शक्यतांची प्राथमिक पातळीवर ओळख करून देण्यात येईल. तज्ज्ञ, समुपदेशक आणि शैक्षणिक संस्थांशी थेट संवाद साधताना विद्यार्थ्यांना विषय निवड, कौशल्यांची गरज आणि करिअर नियोजन याबाबत लवकर टप्प्यात मार्गदर्शन मिळेल. पदवी आणि पदव्युत्तर स्तरावरील महाविद्यालयीन विद्यार्थ्यांसाठी या कॉन्क्लेव्हमध्ये इंटर्नशिप संधी, उच्च शिक्षण मार्गदर्शन आणि थेट भरती प्रक्रियेबाबत संवाद साधण्याची संधी उपलब्ध होणार आहे. या व्यासपीठाच्या माध्यमातून विद्यार्थ्यांना विविध नियोक्त्यांशी संपर्क साधता येईल, व्यावसायिक क्षेत्रातील पर्याय समजून घेता येतील आणि उद्योगक्षेत्रातील अपेक्षा व कार्यकौशल्यांबाबत अधिक स्पष्ट माहिती मिळेल.

या कार्यक्रमात 100 हून अधिक भरती करणाऱ्या कंपन्या आणि शैक्षणिक संस्थांचा सहभाग असणार आहे. यात अनेक अग्रगण्य बहुराष्ट्रीय कंपन्या (MNCs) आणि प्रतिष्ठित शैक्षणिक संस्थांचा समावेश असेल. कॉन्क्लेव्हला उपस्थित राहणाऱ्या विद्यार्थ्यांना तत्काळ प्रवेशसंदर्भात मार्गदर्शन, करिअर समुपदेशन सत्रे आणि थेट भरतीच्या संधी उपलब्ध होतील. त्यामुळे शैक्षणिक संस्था, विद्यार्थी आणि उद्योगक्षेत्र यांच्यातील दुवा निर्माण करणारे एक महत्त्वपूर्ण व्यासपीठ या कार्यक्रमाद्वारे उपलब्ध होईल.

भरती आणि प्रवेशसंदर्भातील संधींबरोबरच साठये करिअर कॉन्क्लेव्ह 2026 मध्ये भविष्यातील कौशल्ये आणि उदयोन्मुख उद्योग प्रवाहांवरील तज्ज्ञ सत्रांचे आयोजन करण्यात येणार आहे. उद्योगक्षेत्रातील तज्ज्ञ विविध क्षेत्रांतील बदल, तांत्रिक प्रगती आणि आधुनिक कार्यक्षेत्रात यशस्वी होण्यासाठी आवश्यक असलेल्या कौशल्यांबाबत विद्यार्थ्यांना मार्गदर्शन करतील. या सत्रांमुळे विद्यार्थ्यांना आधुनिक करिअरच्या मागण्या समजून घेण्यास आणि त्यानुसार स्वतःची तयारी करण्यास मदत होईल.

या कॉन्क्लेव्हमध्ये भारतीय तसेच आंतरराष्ट्रीय विद्यापीठांचाही सहभाग असणार आहे. विशेष अभ्यासक्रम, व्यावसायिक पदवी किंवा परदेशात उच्च शिक्षण घेऊ इच्छिणाऱ्या विद्यार्थ्यांना संबंधित विद्यापीठांच्या प्रतिनिधींशी थेट संवाद साधून मार्गदर्शन मिळण्याची संधी मिळेल.

याशिवाय या कार्यक्रमात उद्योगक्षेत्रातील तज्ज्ञांमार्फत कौशल्य विकास कार्यशाळांचे आयोजन करण्यात येणार आहे. विद्यार्थ्यांच्या रोजगारक्षमता आणि व्यावसायिक तयारी वाढविण्याच्या उद्देशाने आयोजित या कार्यशाळांमध्ये संवादकौशल्य, उद्योगक्षेत्राची समज, करिअर नियोजन आणि बदलत्या परिस्थितीत जुळवून घेण्याची क्षमता यांसारख्या महत्त्वाच्या कौशल्यांवर भर दिला जाईल. आजच्या स्पर्धात्मक रोजगार बाजारात ही कौशल्ये अत्यंत आवश्यक मानली जातात.

विद्यार्थी, शिक्षक, विद्यापीठे आणि उद्योगक्षेत्रातील नेते यांना एकाच छताखाली आणून साठये करिअर कॉन्क्लेव्ह 2026 शिक्षण, नेटवर्किंग आणि व्यावसायिक प्रगतीसाठी एक प्रभावी व्यासपीठ निर्माण करण्याचा प्रयत्न करीत आहे. शालेय आणि महाविद्यालयीन विद्यार्थ्यांसाठी संरचित करिअर मार्गदर्शन आणि उद्योगक्षेत्राचा प्रत्यक्ष अनुभव किती महत्त्वाचा आहे, हे अधोरेखित करणारा हा उपक्रम ठरणार आहे, अशी माहिती माध्यम समन्वयक प्राध्यापक डॉ. गजेंद्र देवडा यांनी दिली.

साठये महाविद्यालयाचे प्राचार्य डॉ. माधव राजवाडे यांनी याबाबत सांगितले की अशा प्रकारच्या उपक्रमांद्वारे साठये कॉलेज विद्यार्थ्यांना योग्य माहिती, व्यापक दृष्टीकोन आणि विविध संधी उपलब्ध करून देण्याच्या आपल्या बांधिलकीची पुन्हा एकदा जाणीव करून देत आहे, जेणेकरून विद्यार्थी सुजाण शैक्षणिक व करिअर निर्णय घेऊ शकतील आणि वेगाने बदलणाऱ्या जगात यशस्वी भवितव्य घडवू शकतील.

---------------

हिंदुस्थान समाचार / Suraj Chaugule