डोंबिवली, 19 मार्च, (हिं.स) - नववर्ष स्वागत यात्रा म्हटलं की डोंबिवली शहराचं नाव लागलीच डोळ्यासमोर येतो. गुढीपाडव्याला निघणारी शोभायात्रा ही डोंबिवलीची सांस्कृतिक ओळख असून हिंदू नववर्षाच्या निमित्ताने शोभायात्रा काढण्याची परंपरा डोंबिवलीतूनच सुरु झाली होती. श्री गणेश मंदिर आणि स्वागत यात्रा संयोजन समिती यांच्या वतीने आयोजित नववर्ष स्वागत यात्रेचे यंदाचे २८ वे वर्ष असल्याने तरुणाईचा उत्सव मोठ्या मोठ्या प्रमाणात दिसून आला.यंदाची स्वागत यात्रा 'वंदे मातरम्'च्या १५० व्या वर्षाच्या विशेष संकल्पनेवर आधारित असून विविध धार्मिक, सांस्कृतिक, शैक्षणिक आणि राष्ट्रभक्तीपर कार्यक्रमांचे आयोजित करण्यात आले होते.ढोल ताशांच्या गजरात,नऊवारी साडी , डोक्यावर फेटे , गॉगल आणि कुर्ता पैजामा परिधान करून पारंपारिक वेशभूषेत मोठ्या उत्साहात डोंबिवलीतील फडके रोडवर गुढीपाडव्याचा सण साजरा करण्यात तरुण तरुणी बहरली होती. तर ढोलताशाच्या गजराने फडके रोड परिसर संपूर्ण दणाणून गेला होता.
आज सकाळी सहा वाजता गणेश मंदिर संस्थानांमधून पालखीची केडीएमसी महापालिका आयुक्त अभिनव गोयल आणि आणि मंदिराचे विश्वस्त यांच्या हस्ते विधीवत पूजा करून डोंबिवली पश्चिमेतील बाग शाळा मैदान येथे पालखी नेण्यात आली. त्यानंतर सकाळी साडेसात वाजता भाग शाळा मैदानीतून ठाणे पोलीस आयुक्त अशितोष डुंबरे महापालिका आयुक्त अभिनव गोयल, खासदार डॉक्टर श्रीकांत शिंदे, आमदार रवींद्र चव्हाण ,राजेश मोरे, मंदिराचे विश्वस्त अलकाताई मुतालिक, प्रवीण दुधे राहुल दामले, मंदार हळबे , आदी लोकप्रतिनिधी, आणि सामाजिक आणि सांस्कृतिक क्षेत्रातील मान्यवर यांच्या हस्ते श्रीफळ वाढवून नववर्ष स्वागत यात्रेला प्रारंभ झाला. भागशाळा मैदान, पंडित दीनदयाल पथ, द्वारका हॉटेल, रेल्वे मार्ग, शिवमंदिर पथ, राजेंद्र प्रसाद पथ, चार रस्ता मानपाडा पथ, छत्रपती शिवाजी महाराज पुतळा (घरडा सर्कल), बाजीप्रभू चौक, फडके पथ आणि आप्पा दातार चौक या मार्गे पालखी नंतर श्री गणेश मंदिर पालखी नेऊन विधीवत पूजा करून नागरिकांच्या दर्शनासाठी ठेवण्यात आली.
यंदाच्या नववर्ष स्वागत यात्रेत सुमारे 100 च्या आसपास संस्था सहभागी झाल्या होत्या.
(स्वागत यात्रेत सहभागी झालेली चित्ररथांमध्ये डोंबिवलीकर चा वंदे मातरम आधारित, खासदार श्रीकांत शिंदे यांचा विकास योजना रथ, स्वा. सावरकर सामाजिक संस्था, कोकण कुणबी, स्वकुल साळी समाज, योग विद्या धाम, राष्ट्रीय स्वयंसेवक संघाची माहिती देणारा रथ ) लक्ष वेधून घेत होते.
यावेळी शोभायात्रेत शहरातील विविध सामाजिक, सांस्कृतिक आणि शैक्षणिक संस्थांनी सहभाग घेतला होता. पारंपरिक मराठी संस्कृतीचे दर्शन घडवणाऱ्या कलापथकांबरोबरच सामाजिक जनजागृती करणारे अनेक चित्ररथही यात सहभागी झाले होते.गुढीपाडव्याच्या या शोभायात्रेत मोठ्या संख्येने नागरिक सहभागी झाले होते. मार्गभर नागरिकांनी शोभायात्रेचे स्वागत करत विविध चित्ररथांचे कौतुक केले.
गणेश मंदिर संस्थानाच्या वतीने आयोजित आप्पा दातार चौकात कार्यक्रमात ऑपरेशन सिंदूर याच्यावर आधारित एक उत्कृष्ट कार्यक्रम शाळकरी मुलांच्या वतीने आयोजित केले होते त्याला उपस्थित मान्यवर आणि डोंबिवलीकरांच्या वतीने विशेष दात देण्यात आली होती. त्याचबरोबर यंदाचे
यंदाची स्वागत यात्रा 'वंदे मातरम्'च्या १५० व्या वर्षाच्या विशेष संकल्पनेवर आधारित असून सामुदायिक वंदे मातरम गायन आणि ऑपरेशन सिंदूर या राष्ट्रभक्तीपर कार्यक्रमांचे उपस्थितांचे मन जिंकले. विद्यार्थ्यांनी सादर केलेल्या राष्ट्रभक्ती कार्यक्रमामुळे डोंबिवलीकरांनी त्यांचे भरभरून कौतुक केले.
ढोल ताशे पथक :
दरवर्षी प्रमाणेच ढोल ताशा पथकाचा उत्साह शिगेला पोहचला होता. यावेळी जवळपास १०ते १२ पथके यामध्ये सहभागी झाली होती. अनेक पथकांमध्ये लहान मुलांचा देखील सहभाग बघायला मिळला.
तरुणाईची गर्दी :
पारंपरिक वेशभूषा करून आलेल्या तरुणाईचा उत्साह शिगेला पोहचला होता. ढोल ताशाच्या गजरात तरुणाईचे पाय आपसूकच थिरकत होते. इतकेच नव्हे तर सर्वच तरुण सेल्फी काढण्यात मोठ्या प्रमाणात दंग झाले होते.
बाईक रॅली :
शोभ यात्रेच्या सुरुवातीलाच फेटा , नाकात नथ , नव्वारी साडी नेसून महिलांनी बुलेट आणि बाईकची रॅली कढली तर सायकल प्रेमी संघटनांनी सायकलीवर बसून शोभ यात्रेत सहभागी झाले होते.
अनेक ठिकाणी पुष्पवृष्टी तर अनेक ठिकाणी पाणी वाटप :
अनेक ठिकाणी शोभ यात्रेत चालत येणाऱ्या सहभागी व्यक्तींना पाणी, सरबत, खाऊ वाटप करण्यात येत होते तर अनेक ठिकाणी शोभायात्रा ज्या वाटेवरून जात होती त्या ठिकाणी पुष्पवृष्टी देखील सुरू होती.
रांगोळ्यांच्या पायघड्या :
सालाबाद प्रमाणे यंदाही संस्कार भारतीचे उमेश पांचाळ यांनी फडके रोड सारख्या अनेक ठिकाणी रांगोळ्यांच्या पायघड्या घातल्या.
हिंदुस्थान समाचार / Prashant Joshi
