इस्लामाबाद, 19 मार्च (हिं.स.)। पाकिस्तान आणि अफगाणिस्तान यांच्यात सुरू असलेल्या संघर्षाला काही दिवसांसाठी स्थगिती देण्यात आली आहे. अधिकाऱ्यांनी सांगितले की, या आठवड्यात येणाऱ्या ईद-उल-फितर (ईद) च्या पार्श्वभूमीवर शत्रुत्वाला ‘तात्पुरता विराम’ देण्याचा निर्णय घेण्यात आला आहे.पाकिस्तान आणि अफगाणिस्तान यांच्यात गेल्या काही आठवड्यांपासून सुरू असलेल्या प्राणघातक हिंसाचारानंतर ईदच्या सणामुळे हा निर्णय घेण्यात आला आहे.

पाकिस्तानचे माहिती मंत्री अताउल्लाह तारड यांनी बुधवारी सांगितले, “हा विराम गुरुवार, १९ मार्चच्या मध्यरात्रीपासून (१९:०० GMT, बुधवार) ते मंगळवार, २४ मार्चच्या मध्यरात्रीपर्यंत (१९:०० GMT, सोमवार) लागू राहील.” पाकिस्तानच्या माहिती मंत्र्यांनी पुढे सांगितले की, सौदी अरेबिया, कतार आणि तुर्की यांच्या विनंतीवरून हा निर्णय घेण्यात आला आहे.

तारड यांनी सोशल मीडियावर पोस्ट शेअर करत म्हटले, “पाकिस्तान हा निर्णय सद्भावनेच्या भावनेतून आणि इस्लामी तत्त्वांनुसार घेत आहे.” मात्र, त्यांनी इशाराही दिला की, “जर सीमापार हल्ला झाला, ड्रोन हल्ला झाला किंवा पाकिस्तानमध्ये कोणतीही दहशतवादी घटना घडली, तर कारवाई अधिक वेगाने तात्काळ पुन्हा सुरू केली जाईल.”पाकिस्तानने ही घोषणा केल्यानंतर काही वेळातच अफगाणिस्तानातील तालिबान सरकारच्या एका प्रवक्त्यानेही पाकिस्तानविरोधातील लष्करी कारवाया तात्पुरत्या थांबवण्याची घोषणा केली.

काही दिवसांपूर्वी अफगाणिस्तानने पाकिस्तानवर आरोप केला होता की पाकिस्तानी सैन्याने अफगाणिस्तानची राजधानी काबुल येथे असलेल्या एका व्यसनमुक्ती केंद्रावर हवाई हल्ला केला, ज्यामध्ये शेकडो लोकांचा मृत्यू झाला.दरम्यान, पाकिस्तानने हा दावा पूर्णपणे फेटाळून लावला आहे. पाकिस्तानने याच आठवड्यात माध्यमांना दिलेल्या माहितीनुसार, ते फक्त दहशतवादी तळ आणि लष्करी ठिकाणांनाच लक्ष्य करतात.

---------------

हिंदुस्थान समाचार / Priyanka Bansode