बीड, 25 मार्च (हिं.स.) :माजलगाव येथे पोलिसांच्या संगनमतातून सुरू असलेल्या कथित वाळू तस्करी प्रकरणात अद्याप कोणतेही ठोस पुरावे हाती आलेले नाहीत, असे मुख्यमंत्री देवेंद्र फडणवीस यांनी विधानसभेत सांगितले.

आमदार प्रकाश सोळंके यांच्या प्रश्नावर उत्तर देताना मुख्यमंत्र्यांनी स्पष्ट केले की या प्रकरणातील संशयित तीन व्यक्तींचे मोबाईल जप्त करून त्यातील डिलीट केलेला डेटा अत्याधुनिक तंत्रज्ञानाच्या मदतीने पुनर्प्राप्त केला गेला होता. मात्र, या डेटाच्या सखोल विश्लेषणानंतरही पोलीस आणि तस्करांमध्ये थेट संगनमत असल्याचे सिद्ध होऊ शकलेले नाही.या प्रकरणात एका हवालदाराला लाचलुचपत प्रतिबंधक विभागाने आधीच निलंबित केले आहे, तर संबंधित पोलीस निरीक्षकाचा सहभाग निष्पन्न न झाल्याने त्यांची पुन्हा बदली करण्यात आली आहे. तपासावर कोणताही प्रभाव पडू नये यासाठी संबंधितांना नियंत्रण कक्षात ठेवण्यात आले होते.

सरकारने प्रकरणाची गंभीरता लक्षात घेऊन सर्व संभाव्य बाजूंची सखोल चौकशी करण्याचे आश्वासन दिले असून, गुन्हे अन्वेषण यंत्रणेला अधिक प्रभावी करण्यावर भर दिला जात आहे.-----------------

हिंदुस्थान समाचार / Aparna Chitnis