जम्मू, २६ मार्च (हिं.स.). चैत्र नवरात्रीदरम्यान जम्मू आणि काश्मीरच्या रियासी जिल्ह्यातील माता वैष्णो देवी मंदिरात भाविकांची प्रचंड गर्दी झाली होती. या काळात २६ लाखांहून अधिक भाविकांनी या गुहा मंदिराला भेट दिली.

माता वैष्णो देवी तीर्थक्षेत्र मंडळाच्या एका वरिष्ठ अधिकाऱ्याने प्रसारमाध्यमांना सांगितले की, यात्रा सुरळीतपणे सुरू आहे. २५ मार्चपर्यंत २,६९,७१६ भाविकांनी मंदिराला भेट दिली आहे. 'जय माता दी'चा जयघोष करत शेकडो भाविक माता वैष्णो देवी मंदिराकडे जाणाऱ्या वळणदार मार्गावरून पायी प्रवास करत आहेत. आकडेवारीनुसार, नवरात्रीच्या पहिल्या दिवशी, १९ मार्च रोजी ३१,८१५ भाविकांनी मंदिराला भेट दिली. त्यानंतर २० मार्च रोजी ३४,८०५, २१ मार्च रोजी ४१,०७८, २२ मार्च रोजी ४३,४८२, २३ मार्च रोजी ४५,४७८, २४ मार्च रोजी ३८,१५८ आणि २५ मार्च रोजी ३४,९०० भाविकांनी भेट दिली. प्रचंड गर्दीचे व्यवस्थापन करण्यासाठी भाविकांची नोंदणी दोनदा थोड्या कालावधीसाठी स्थगित करण्यात आली होती.

नऊ दिवसांचा चैत्र नवरात्री उत्सव बहुस्तरीय सुरक्षेत सुरू झाला. या उत्सवाचा मार्ग आणि मंदिर परिसर दिव्यांच्या रोषणाईने व फुलांच्या सजावटीने उजळून निघाला होता, तसेच वातावरण आध्यात्मिक उत्साह आणि पारंपरिक आनंदाने भारलेले होते. भाविकांचा सुरक्षित प्रवास सुनिश्चित करण्यासाठी प्रशासनाने कटरा बेस कॅम्पवर आणि मंदिराकडे जाणाऱ्या मार्गावर बहुस्तरीय सुरक्षा तैनात केली आहे. मंडळाने यात्रेकरूंना मार्गदर्शन करण्यासाठी, अपेक्षित गर्दीचे व्यवस्थापन करण्यासाठी आणि १३ किलोमीटर लांबीच्या यात्रा मार्गावर वाहतूक सुरळीत ठेवण्यासाठी स्वयंसेवक तैनात केले आहेत.

अधिकाऱ्याने सांगितले की, यावर्षी यात्रा मार्गावर समन्वय आणि संवाद सुधारण्यासाठी श्रीन बोर्डाने वायरलेस कम्युनिकेशन सुरू केले आहे. संपूर्ण उत्सवादरम्यान पोलीस, सीआरपीएफ, इतर निमलष्करी दल आणि जलद प्रतिसाद पथकांचा (QRTs) समावेश असलेली बहुस्तरीय सुरक्षा व्यवस्था लागू करण्यात आली आहे. चैत्र नवरात्रीच्या शुभ प्रारंभाच्या निमित्ताने, पवित्र गुहेतील वैदिक मंत्र आणि विधींचे दिव्य स्पंदन संपूर्ण मानवजातीवर शांती, समृद्धी आणि कल्याणाचा आशीर्वाद देत आहेत.

---------------

हिंदुस्थान समाचार / वृषाली देशपांडे