नवी दिल्ली, 26 मार्च (हिं.स.) दिल्लीहून लंडन हिथ्रोला जाणाऱ्या एअर इंडियाच्या विमानात तांत्रिक बिघाड झाल्याने, उड्डाणानंतर काही तासांनी विमानाला दिल्लीला परतावे लागले. या घटनेमुळे प्रवाशांची अनपेक्षित गैरसोय तर झालीच, पण एअरलाइनच्या नुकत्याच दाखल झालेल्या आधुनिक विमानांच्या स्थितीबद्दलही प्रश्न निर्माण झाले आहेत.

गुरुवारी सकाळी सुमारे ६ वाजता, एअर इंडियाचे विमान AI111 दिल्लीहून लंडनसाठी निघाले. फ्लाइट ट्रॅकिंग वेबसाइट Flightradar24.com वर उपलब्ध असलेल्या माहितीनुसार, विमान सौदी अरेबियाच्या हवाई हद्दीत असताना परत फिरण्याचा निर्णय घेण्यात आला. हा निर्णय घेण्यापूर्वी विमान सुमारे चार तास हवेत होते.परतीच्या प्रवासासह, एकूण सात तास हवेत राहिल्यानंतर विमान दुपारी सुमारे १२:३० वाजता दिल्ली विमानतळावर सुरक्षितपणे उतरले.

या परिस्थितीवर प्रतिक्रिया देताना, एअर इंडियाच्या प्रवक्त्याने स्पष्ट केले की, संभाव्य तांत्रिक बिघाडामुळे खबरदारीचा उपाय म्हणून विमान परत पाठवण्यात आले होते.प्रवक्त्याने सांगितले की, विमान सुरक्षितपणे उतरले असून एअर इंडियाच्या उच्च सुरक्षा मानकांनुसार त्याची सविस्तर तांत्रिक तपासणी सुरू आहे. या विस्तृत तपासणी प्रक्रियेला अतिरिक्त वेळ लागेल.एअरलाइनने प्रवाशांना झालेल्या अनपेक्षित गैरसोयीबद्दल माफी मागितली आणि सांगितले की, प्रवासी लवकरात लवकर लंडनला पोहोचतील याची खात्री करण्यासाठी सर्वतोपरी प्रयत्न केले जात आहेत.

एअर इंडियाने जानेवारी २०२४ मध्ये या नवीन A350-900 विमानांचे संचालन सुरू केले. या घटनेत सामील असलेल्या विशिष्ट विमानाला (VT-JRF) तांत्रिक समस्यांचा पूर्वेतिहास आहे.

---------------

हिंदुस्थान समाचार / वृषाली देशपांडे