नवी दिल्ली, 05 मार्च (हिं.स.) : पश्चिम आशियातील वाढत्या तणावाचा परिणाम आंतरराष्ट्रीय हवाई प्रवासावर गंभीरपणे होत आहे. इराणवर अमेरिका आणि इस्रायलने केलेल्या हल्ल्यानंतर निर्माण झालेल्या संकटामुळे चौथ्या दिवशीही अनेक देशांनी आपले हवाई क्षेत्र बंद ठेवले आहे. त्यामुळे हजारो उड्डाणे रद्द करावी लागली असून लाखो प्रवासी विविध विमानतळांवर अडकले आहेत.

नागरी उड्डाण मंत्रालयाच्या माहितीनुसार, मंगळवारपर्यंत भारतीय विमान कंपन्यांची 1,221 आंतरराष्ट्रीय उड्डाणे आणि परदेशी विमान कंपन्यांची 388 उड्डाणे रद्द झाली होती. हवाई क्षेत्र बंद होणे आणि सुरक्षेच्या धोक्यामुळे अनेक विमान कंपन्यांना आपले मार्ग बदलावे लागले किंवा उड्डाणे थांबवावी लागली, ज्यामुळे प्रवाशांना मोठ्या अडचणींचा सामना करावा लागत आहे.

भारतीय नागरिकांना परत आणण्यासाठी विशेष उड्डाणे

परदेशात अडकलेल्या भारतीय नागरिकांना बाहेर काढण्यासाठी विमान कंपन्यांनी विशेष उड्डाणांची संख्या वाढवली आहे. बुधवारी भारतीय विमान कंपन्यांनी 58 विशेष उड्डाणे चालवण्याची योजना आखली आहे. यामध्ये इंडिगोची 30 उड्डाणे आणि एअर इंडिया तसेच एअर इंडिया एक्सप्रेसची 23 उड्डाणे समाविष्ट आहेत.

इंडिगोवर सर्वाधिक परिणाम

या संकटाचा सर्वाधिक परिणाम इंडिगोवर झाला आहे. कंपनीने दिलेल्या माहितीनुसार 28 फेब्रुवारीपासून आतापर्यंत 500 पेक्षा जास्त उड्डाणे रद्द करावी लागली आहेत. एवढ्या मोठ्या प्रमाणावर उड्डाणे रद्द झाल्यामुळे प्रवाशांना मोठ्या गैरसोयींचा सामना करावा लागत आहे.

एअर इंडियाने वाढवली लांब पल्ल्याच्या उड्डाणांची क्षमता

वाढत्या मागणीचा विचार करून एअर इंडियाने काही महत्त्वाच्या लांब पल्ल्याच्या मार्गांवर उड्डाणांची क्षमता वाढवण्याची घोषणा केली आहे. यामध्ये टोरोंटो, फ्रँकफर्ट आणि पॅरिस या शहरांसाठी अतिरिक्त उड्डाणांचा समावेश आहे. या सेवांचा उद्देश दिल्लीहून देशांतर्गत तसेच दक्षिण-पूर्व आशियातील नेटवर्कसाठी अधिक चांगली जोडणी उपलब्ध करून देणे हा आहे.

अनेक विमानतळ बंद, उड्डाणे तात्पुरती स्थगित

बहरैन, दोहा आणि कुवैत येथील विमानतळांवर प्रवासी सेवा पूर्णपणे बंद करण्यात आली आहे. तसेच एमिरेट्स आणि एअर अरेबियाने जाहीर केले आहे की दुबईहून येणारी आणि जाणारी सर्व नियमित उड्डाणे शनिवार मध्यरात्रीपर्यंत स्थगित राहतील.

एमिरेट्सने प्रवाशांना सांगितले आहे की रद्द झालेल्या उड्डाणांमुळे प्रभावित प्रवासी सोशल मीडियाद्वारे संपर्क साधू शकतात. कंपनीने हेही स्पष्ट केले की 12 मार्च किंवा त्यापूर्वीच्या बुकिंगसाठी प्रवासी थेट रिफंडची विनंती करू शकतात.

डीजीसीएची सूचना

संकट सुरू झालेल्या 28 फेब्रुवारी रोजीच डीजीसीए ने सर्व भारतीय विमान कंपन्यांना सूचना जारी केली होती. या सूचनेत तेहरान, तेल अवीव, बेरुत, जेद्दा, बहरैन, मस्कट, बगदाद, अम्मान, कुवैत आणि दोहा या उच्च-जोखीम असलेल्या हवाई क्षेत्रांपासून दूर राहण्याचा सल्ला देण्यात आला होता. त्यानुसार विमान कंपन्या आपले मार्ग बदलत आहेत किंवा उड्डाणे रद्द करत आहेत.पश्चिम आशियातील तणावामुळे जागतिक हवाई वाहतुकीवर मोठा परिणाम झाला आहे. परिस्थिती सामान्य होईपर्यंत प्रवाशांना उड्डाणे रद्द होणे आणि विलंबाचा सामना करावा लागू शकतो.

--------------------------

हिंदुस्थान समाचार / मनीष कुलकर्णी