नवी दिल्ली , 05 मार्च (हिं.स.)।काँग्रेस नेते आणि लोकसभेतील विरोधी पक्षनेते राहुल गांधी यांनी गुरुवारी पंतप्रधान नरेंद्र मोदी यांच्यावर पुन्हा टीका केली आहे. श्रीलंकेजवळ एका अमेरिकन पाणबुडीने हिंद महासागरात एका इराणी युद्धनौकेवर हल्ला केला. या घटनेवर पंतप्रधान मोदी यांनी मौन बाळगल्याबद्दल राहुल गांधी यांनी प्रश्न उपस्थित केले आहेत.
राहुल गांधी यांनी एक्सवर पोस्ट करत म्हटले की पश्चिम आशियातील संघर्ष आता भारताच्या दारात येऊन पोहोचला आहे. त्यांनी पंतप्रधान मोदींवर आरोप केला की त्यांनी भारताची रणनीतिक स्वायत्तता सोडून दिली आहे. राहुल गांधी म्हणाले की अशा परिस्थितीत देशाला स्थिर नेतृत्वाची गरज आहे.ते पुढे म्हणाले, “हा संघर्ष आता आपल्या घरापर्यंत पोहोचला आहे. हिंद महासागरात एक इराणी युद्धनौका बुडाली आहे. तरीही पंतप्रधानांनी यावर काहीही वक्तव्य केलेले नाही. त्याऐवजी भारताकडे असा पंतप्रधान आहे ज्यांनी आपली रणनीतिक स्वायत्तता सोडून दिली आहे.”
राहुल गांधी यांनी खाडी प्रदेशातील वाढत्या तणावामुळे भारताच्या तेल पुरवठ्यावर निर्माण झालेल्या धोक्याबद्दलही चिंता व्यक्त केली. ते म्हणाले, “भारताच्या तेलपुरवठ्यावर धोका निर्माण झाला आहे, कारण आपल्या आयातीपैकी ४० टक्क्यांहून अधिक तेल होर्मुझच्या सामुद्रधुनीतून येते. एलपीजी आणि एलएनजीसाठी तर परिस्थिती आणखी गंभीर आहे.”
दरम्यान ही इराणी युद्धनौका ‘आइरिस देना’ विशाखापट्टणम येथे आयोजित आंतरराष्ट्रीय फ्लीट रिव्ह्यू २०२६ (IFR) आणि मिलान २०२६ या कार्यक्रमांमध्ये सहभागी झाल्यानंतर परतत होती. या कार्यक्रमांसाठी भारतानेच या जहाजाला आमंत्रित केले होते. अहवालांनुसार, या इराणी जहाजावर सुमारे १८० जण होते. श्रीलंकेच्या नौदलाने माहिती दिली की ८७ मृतदेह सापडले आहेत, तर ३२ जणांना वाचवण्यात आले आहे. बचावलेल्या लोकांना श्रीलंकेच्या दक्षिणेकडील गाले शहरातील रुग्णालयात उपचारासाठी दाखल करण्यात आले आहे.
---------------
हिंदुस्थान समाचार / Priyanka Bansode
