अमरावती, 06 मार्च (हिं.स.) । खोलापूरहद्दीत म्हैसपूर येथील व्यक्तीचा मोबाईल हॅक करून त्यांच्या बँकखात्यातून ऑनलाइन ९८ हजार ५०० रुपयांची रोकड परस्पर वापरून ऑनलाइन फसवणूक करण्यात आली. उमेश रामराव ढोके (वय ४५), असे फसवणूक झालेल्या व्यक्तीचे नाव आहे. उमेश ढोके यांच्याजवळ असलेल्या मोबाईलवर फोन पे ऍप होते. त्यावरून ढोके हे आर्थिक व्यवहार करीत होते. त्यांच्या बँकखात्यामध्ये आधी ४५ हजार रुपये होते. शिवाय त्यांच्या शेताचे एक लाख पाच हजार रुपये, असे दीड लाख रुपये होते. त्यापैकी काही त्यातून किरकोळ खर्च उमेश ढोके यांनी केला होता. २८ फेब्रुवारी रोजी साडेपाच ते सहा, या वेळात त्यांचा मोबाईल कुणीतरी हॅक केला होता. त्यावेळेत ढोके यांनी त्याकडे लक्ष दिले नाही. त्यांनी फोन पे अॅपचा मॅसेज मोबाईलवर बघितला असता त्यांच्या बँकखात्यातून एका अनोळखी व्यक्तीने ९८ हजार ५०० रुपयांचे कुणाला तरी पेमेंट केले. उमेश रामराव ढोके यांनी सदर घटनेची तक्रार सायबर पोलिसांकडे केली. खोलापूर ठाण्यात ढोके यांच्या तक्रारीवरून अज्ञात व्यक्तीविरुद्ध फसवणुकीचा गुन्हा दाखल करण्यात आला.

---------------

हिंदुस्थान समाचार / अरुण जोशी