शेतकऱ्यांनी पालिकेच्या विभागीय कार्यालयात आपले मागण्या मांडल्या
डोंबिवली, 01 एप्रिल (हिं.स.) : पश्चिमेकडील मोठागांव येथील शेतकऱ्यांनी रिंगरूट प्रकल्पामुळे बाधित झालेल्या जमिनीच्या मोबदल्याबाबत नाराजी व्यक्त केली आहे. भाजपाचे नगरसेवक दीपेश म्हात्रे यांच्या नेतृत्वाखाली शेतकऱ्यांनी बुधवारी कल्याण डोंबिवली महानगरपालिकेच्या डोंबिवली विभागीय ह प्रभागक्षेत्र कार्यालयात पालिकेचे नगररचनाकार टेंगळे यांच्याशी बैठक घेतली.
नगरसेवक दीपेश म्हात्रे यांनी सांगितले की, मोठागांव येथील रिंगरूट कामामुळे साडे पाच हेक्टर जमीन बाधित होत असून, सरकारकडून टीडीआर (जमीन परतावा) दिला जाणार आहे. मात्र शेतकऱ्यांची मागणी आहे की, टीडीआरऐवजी रोख रक्कम स्वरूपात मोबदला द्यावा. शेतकऱ्यांनी आपली जमीन कवडीमोल भावाने घेऊ नये आणि अन्याय केला जाऊ नये, असेही त्यांनी निदर्शनास आणले.
शेतकऱ्यांच्या म्हणण्यानुसार, प्रशासनाने गेल्या काही वर्षांत चार-पाच प्रकल्पांसाठी हीच पद्धत वापरली असून, त्यामुळे अनेक शेतकऱ्यांकडे जमीन उरली नाही. काही शेतकऱ्यांच्या जमिनीवर ठेकेदाराने भराव टाकल्याचे आरोपही उपस्थित केले गेले, ज्यावर पोलीस ठाण्यात तक्रार दाखल करण्यात आली होती.
पालिकेचे नगररचनाकार टेंगळे यांनी सांगितले की, प्रशासन टीडीआर देण्यास तयार आहे, परंतु शेतकऱ्यांच्या रोख रक्कमेतील मोबदला मागणीसंबंधी सूचना आयुक्तांकडे पोहोचवली जाईल. भाजपा नगरसेवक दीपेश म्हात्रे यांनी पालिका आयुक्त, लोकप्रतिनिधी आणि शेतकऱ्यांची बैठक घेण्याची मागणीही केली आहे.
-------------------
हिंदुस्थान समाचार / Prashant Joshi
