- पंतप्रधान मोदींनी व्यक्त केले दुःख

चेन्नई, 18 एप्रिल (हिं.स.)। तामिळनाडू राज्यातील कोयंबटूर जिल्ह्यातील पोल्लाची परिसरात झालेल्या भीषण रोड अपघातात केरळमधील नऊ जणांचा दुर्दैवी मृत्यू झाला आहे. ही घटना त्या वेळी घडली जेव्हा प्रवाशांनी भरलेली टेम्पो ट्रॅव्हलर वॅन सुमारे ८०० फूट खोल दरीत कोसळली. या अपघातामुळे संपूर्ण परिसरात हळहळ व्यक्त केली जात असून मृतांच्या कुटुंबीयांवर दुःखाचा डोंगर कोसळला आहे.

पोलिसांनी दिलेल्या माहितीनुसार, ही वॅन केरळमधील अथिरापल्ली येथून पोल्लाचीच्या दिशेने जात होती. वलपराई हिल रोडवरील १३व्या वळणावर चालकाचे वाहनावरील नियंत्रण सुटले आणि वॅन रस्त्याच्या कडेला असलेल्या गार्डरेलला धडकून थेट दरीत कोसळली. अपघात इतका भीषण होता की वाहन पूर्णपणे चक्काचूर झाले. या वॅनमध्ये केरळमधील मलप्पुरम जिल्ह्यातील पांग परिसरातील पल्लिपरंबा स्कूलचे शिक्षक, विद्यार्थी तसेच काही शिक्षकांचे कुटुंबीय प्रवास करत होते. वलपराई येथे पर्यटन करून हे सर्वजण परत केरळकडे निघाले होते. वॅनमध्ये एकूण १६ जण प्रवास करत होते.

या दुर्घटनेत मृत्यू पावलेल्यांमध्ये स्कूलच्या मुख्याध्यापिका अजिता (५४) यांचा समावेश आहे. त्यांच्यासोबत रामला (५२), सुहारा (४३), आशा (४१), मजीद (४३), सजिता (४५), शकीला (३७) आणि रुकिया (३९) हे शिक्षकही मृत्युमुखी पडले आहेत. याशिवाय वॅनचा ड्रायव्हर नौशाद (३९) याचाही मृत्यू झाला आहे. या सर्व मृतांची ओळख पटली असून ते सर्वजण पांग परिसरातील रहिवासी होते.

अपघातात जखमी झालेल्या प्रवाशांना तातडीने पोल्लाची येथील गव्हर्नमेंट हॉस्पिटलमध्ये उपचारासाठी दाखल करण्यात आले आहे. वालपराई पोलीस आणि फायर सर्व्हिसच्या पथकाने घटनास्थळी धाव घेऊन बचावकार्य केले आणि मृतदेह बाहेर काढले.

कोयंबतूरचे जिल्हाधिकारी पवन कुमार यांनी सांगितले की, बचावकार्य अतिशय वेगाने पार पाडण्यात आले. अपघाताची माहिती मिळताच केरळचे विद्युत मंत्री कृष्णन कुट्टी पोल्लाची येथे दाखल झाले आणि त्यांनी सांगितले की, मुख्यमंत्र्यांशी चर्चा केल्यानंतर मृतांच्या रकमा भरपाईची घोषणा केली जाईल.

या दुर्दैवी घटनेबद्दल देशाचे पंतप्रधान नरेंद्र मोदी यांनीही तीव्र दुःख व्यक्त केले आहे. त्यांनी सोशल मीडिया प्लॅटफॉर्म एक्सवर पोस्ट करताना म्हटले की, कोयंबटूरमधील या अपघाताची बातमी ऐकून मन अत्यंत व्यथित झाले असून मृतांच्या कुटुंबीयांप्रती त्यांनी मनःपूर्वक संवेदना व्यक्त केल्या आहेत. तसेच जखमी लवकर बरे व्हावेत अशी प्रार्थनाही त्यांनी केली आहे.या भीषण रोड अपघातामुळे वलपराई हिल रोडवरील धोकादायक वळणांबाबत पुन्हा एकदा प्रश्नचिन्ह निर्माण झाले असून अशा ठिकाणी अधिक सुरक्षा उपाययोजना करण्याची गरज व्यक्त केली जात आहे.

---------------

हिंदुस्थान समाचार / Suraj Chaugule