बंगळुरू , 26 एप्रिल (हिं.स.)।कर्नाटकातील मंगळुरू जिल्ह्यात धार्मिक मिरवणुकीदरम्यान मोठी दुर्घटना घडली. दक्षिण कन्नड जिल्ह्यातील मूडबिद्री तालुक्यात एक अरुंद पादचारी पूल अचानक कोसळला, त्यामुळे मिरवणुकीत सहभागी झालेल्या ८ जणांना दुखापत झाली. पोलिसांनी शनिवारी या घटनेची माहिती दिली.

पोलिसांच्या माहितीनुसार, ही घटना होसाबेट्टूजवळील बावदाबैले परिसरात घडली. भाविक धर्मनेमा अनुष्ठानाच्या तयारीअंतर्गत पवित्र नैवेद्यांसह पालखी घेऊन जात होते. ही मिरवणूक सनदगुड्डे पडिहोडिबेट्टू येथील मंदिरातून सुरू होऊन टकोडे बार्के येथील एका घराकडे जात होती. अधिकाऱ्यांच्या म्हणण्यानुसार, या मिरवणुकीत सुमारे २५ जण सहभागी होते. पारंपरिक वाद्यांच्या गजरात भाविक अरुंद पादचारी पुलावरून जात असताना, समूह पुलाच्या मध्यभागी पोहोचताच अचानक आधार देणारी बीम तुटली आणि पूल क्षणार्धात कोसळला.

पूल कोसळल्यानंतर पालखी आणि अनेक भाविक सुमारे १० फूट खोल दरीत पडले. या दुर्घटनेनंतर घटनास्थळी एकच गोंधळ उडाला. स्थानिक नागरिक तात्काळ मदतीसाठी धावले आणि बचावकार्य सुरू केले.जखमींमध्ये हरीश नावाच्या व्यक्तीच्या दोन्ही पायांना फ्रॅक्चर झाले आहे, तर मरूर येथील सुनील शेट्टी गंभीर जखमी झाले आहेत. उर्वरित सहा जणांना किरकोळ दुखापत झाली आहे. सर्व जखमींना उपचारासाठी खासगी रुग्णालयात दाखल करण्यात आले आहे.

पोलिसांनी सांगितले की, हा पादचारी पूल सुमारे ५० वर्षे जुना होता आणि अत्यंत जीर्ण अवस्थेत होता. प्राथमिक तपासात पुलाची आधार बीम कमकुवत झाल्याचे समोर आले असून, त्यामुळेच ही दुर्घटना घडल्याचे सांगितले जात आहे. या घटनेनंतर स्थानिक प्रशासन आणि पोलिसांचे पथक घटनास्थळी पोहोचले. आता पुलाची स्थिती, देखभाल आणि सुरक्षा निकष याबाबत चौकशी सुरू करण्यात आली आहे. स्थानिक नागरिकांनी जुन्या पुलांची वेळोवेळी तपासणी करण्याची मागणी केली आहे.

---------------

हिंदुस्थान समाचार / Priyanka Bansode