तेहरान , 27 एप्रिल (हिं.स.)।अमेरिका आणि इराण यांच्यात करार घडवून आणण्याच्या प्रयत्नांदरम्यान पाकिस्तानच्या भूमिकेबाबत आता प्रश्नचिन्ह निर्माण होऊ लागले आहेत. रविवारी एका इराणी खासदाराने इस्लामाबादच्या मध्यस्थी क्षमतेवर गंभीर आक्षेप घेत त्याला पक्षपाती ठरवले.
इराणच्या राष्ट्रीय सुरक्षा आणि परराष्ट्र धोरण आयोगाचे प्रवक्ते तसेच दश्तेस्तान मतदारसंघाचे खासदार इब्राहिम रजाई यांनी सोशल मीडिया प्लॅटफॉर्म एक्सवर पोस्ट करत म्हटले की, मध्यस्थ पूर्णपणे निष्पक्ष असणे आवश्यक आहे, मात्र पाकिस्तान या निकषावर खरा उतरत नाही. त्यांनी आरोप केला की, पाकिस्तान नेहमीच अमेरिकेचे राष्ट्राध्यक्ष डोनाल्ड ट्रम्प यांच्या हितांचा विचार करतो आणि अमेरिकेविरोधात उघडपणे बोलत नाही.
रजाई म्हणाले की, पाकिस्तान हा इराणचा चांगला शेजारी आणि मित्रदेश असला, तरी चर्चेसाठी तो विश्वासार्ह मध्यस्थ नाही. त्यांनी असा दावाही केला की, अमेरिकेने यापूर्वी पाकिस्तानमार्फत दिलेला प्रस्ताव स्वीकारला होता, मात्र नंतर आपल्या शब्दावरून माघार घेतली. याबाबतची माहिती पाकिस्तानने जगासमोर मांडली नाही. ते पुढे म्हणाले की, अमेरिकेने लेबनॉन आणि जप्त करण्यात आलेल्या मालमत्तांबाबतही अनेक आश्वासने दिली होती, पण ती पूर्ण केली नाहीत. अशा परिस्थितीत निष्पक्ष मध्यस्थाची भूमिका निभावण्याऐवजी पाकिस्तान एका बाजूला झुकलेला दिसतो.
दरम्यान, इराणचे परराष्ट्रमंत्री अब्बास अराघची चर्चा पुढे नेण्यासाठी सातत्याने प्रयत्न करत आहेत. त्यांनी नुकताच पाकिस्तान दौरा केला, जिथे त्यांनी लष्करप्रमुख आसिम मुनीर आणि पंतप्रधान शहबाज शरीफ यांच्यासह अनेक वरिष्ठ नेत्यांची भेट घेतली. यापूर्वी अराघची ओमानलाही गेले होते, जिथे त्यांनी सुलतान हैथम बिन तारिक अल-सईद यांच्यासोबत होर्मुझ सामुद्रधुनीची सुरक्षा आणि राजनैतिक मुद्द्यांवर चर्चा केली होती.
अहवालांनुसार, या चर्चांमध्ये केवळ अणु मुद्दाच नव्हे, तर समुद्री मार्गांसाठी नवीन कायदेशीर चौकट, सुरक्षा हमी, नुकसानभरपाई आणि अमेरिकेने लादलेले समुद्री निर्बंध हटवणे अशा मुद्द्यांचाही समावेश होता.दरम्यान, चर्चेचा वेग मंदावल्याच्या पार्श्वभूमीवर डोनाल्ड ट्रम्प यांनी म्हटले आहे की, जर इराणला चर्चा करायची असेल, तर त्याने स्वतः पुढाकार घ्यावा. हे वक्तव्य अशा वेळी आले आहे, जेव्हा अमेरिकेने पाकिस्तानमध्ये प्रस्तावित चर्चा रद्द केली आहे.
---------------
हिंदुस्थान समाचार / Priyanka Bansode
