इस्लामाबाद, 28 एप्रिल (हिं.स.)।पाकिस्तानचे माजी पंतप्रधान इमरान खान हे भ्रष्टाचाराच्या आरोपांप्रकरणी दीर्घकाळापासून तुरुंगात आहेत. त्यांच्या उजव्या डोळ्यावरील उपचार पूर्ण झाल्यानंतर आज, मंगळवारी त्यांना पुन्हा तुरुंगात पाठवण्यात आले.

७४ वर्षीय इमरान खान यांना यावर्षी जानेवारीच्या अखेरीस ‘राइट सेंट्रल रेटिनल व्हेन ऑक्लूजन’ (सीआरव्हीओ) हा आजार असल्याचे निदान झाले होते. त्यानंतर त्यांना पाकिस्तान इन्स्टिट्यूट ऑफ मेडिकल सायन्सेस (पीआयएमएस) येथे दाखल करण्यात आले होते. येथे त्यांना अँटी-व्हीईजीएफ इंजेक्शन देण्यात आले. हा उपचार दर महिन्याला पुन्हा केला जात आहे.

पीआयएमएसच्या प्रवक्त्यांच्या माहितीनुसार, इमरान खान यांना २८ एप्रिल रोजी पुढील नेत्रोपचारासाठी रुग्णालयात आणण्यात आले होते. त्यावेळी त्यांना चौथे इंट्राविट्रियल इंजेक्शन देण्यात आले. प्रवक्त्यांनी सांगितले की, “उपचारापूर्वी नेत्रतज्ज्ञांनी त्यांची तपासणी केली आणि त्यांची प्रकृती स्थिर असल्याचे आढळले.” उपचाराचा चौथा टप्पा पूर्ण झाल्यानंतर इमरान खान यांना पुन्हा तुरुंगात पाठवण्यात आले.

वैद्यकीय अधिकाऱ्यांनी पुढे सांगितले की, इमरान खान यांची ऑप्टिकल कोहेरन्स टोमोग्राफी (ओसीटी) करण्यात आली असून त्यात वैद्यकीय सुधारणा दिसून आली. शल्यचिकित्सकांच्या देखरेखीखाली मायक्रोस्कोपीच्या सहाय्याने त्यांना इंट्राविट्रियल इंजेक्शनची चौथी मात्रा देण्यात आली. पीआयएमएसच्या प्रवक्त्यांनी सांगितले, “रुग्णालयात असताना इमरान खान उपचारापूर्वी, उपचारादरम्यान आणि उपचारानंतरही शारीरिकदृष्ट्या स्थिर होते. त्यांना पुढील काळजी, फॉलो-अप सल्ला आणि संबंधित कागदपत्रांसह डिस्चार्ज देण्यात आला.”

पाकिस्तान तहरीक-ए-इन्साफचे चेअरमन गोहर अली खान यांनी सोशल मीडिया प्लॅटफॉर्म एक्सवर पोस्ट करत खान यांच्या वैद्यकीय तपासणीची पुष्टी केली. गोहर अली खान म्हणाले, “उपचार कोणताही असो, आमच्या मुख्य चिंतेचे उत्तर अजूनही मिळालेले नाही.” गोहर अली खान यांनी त्या मागणीचाही उल्लेख केला, ज्यामध्ये खान आणि त्यांच्या पत्नी बुशरा बीबी यांना रुग्णालयात दाखल करून त्यांच्या खासगी डॉक्टरांच्या देखरेखीखाली तसेच कुटुंबीयांच्या उपस्थितीत उपचार करण्याची मागणी करण्यात आली होती.

इमरान खान यांच्या पत्नी बुशरा बीबी यांच्यावर १७ एप्रिल रोजी रावळपिंडी येथील रुग्णालयात डोळ्याची शस्त्रक्रिया करण्यात आली होती. त्यानंतर त्यांना पुन्हा रावळपिंडीच्या अदियाला तुरुंगात पाठवण्यात आले. गेल्या वर्षी जानेवारीत अल-कादिर ट्रस्ट प्रकरणात दोषी ठरल्यानंतर इमरान खान आणि बुशरा बीबी हे दोघेही रावळपिंडीच्या अदियाला तुरुंगात बंद आहेत.

---------------

हिंदुस्थान समाचार / Priyanka Bansode