नवी दिल्ली, 28 एप्रिल:(हिं.स.) : शांघाय सहकार्य संघटनेच्या (एससीओ) संरक्षण मंत्र्यांच्या बैठकीत भारताचे संरक्षण मंत्री राजनाथ सिंह यांनी दहशतवाद, विभाजनवाद आणि उग्रवादाविरुद्ध सर्व सदस्य देशांनी एकत्रित आणि ठोस मोर्चा उभारण्याचे आवाहन केले. त्यांनी स्पष्ट केले की दहशतवाद्यांना मिळणारी सुरक्षित आश्रयस्थाने नष्ट करणे ही काळाची गरज आहे.
किर्गिस्तानच्या बिश्केक येथे पार पडलेल्या या बैठकीत बोलताना राजनाथ सिंह यांनी सांगितले की, दहशतवादाला कोणताही धर्म किंवा राष्ट्रीयता नसते, त्यामुळे या धोक्याविरोधात सर्व देशांनी एकत्रित भूमिका घेणे आवश्यक आहे. त्यांनी “ऑपरेशन सिंदूर”चा उल्लेख करत भारताची दहशतवादाविरोधातील कठोर भूमिका अधोरेखित केली.
राजनाथ सिंह यांनी सांगितले की, राज्य-प्रायोजित सीमापार दहशतवाद दुर्लक्षित करता येणार नाही आणि अशा परिस्थितीत दुहेरी निकषांना कोणतेही स्थान नसावे. त्यांनी एससीओच्या ‘प्रादेशिक दहशतवादविरोधी संरचने’च्या भूमिकेचे महत्त्व अधोरेखित केले.
त्यांनी पुढे सांगितले की, सध्याच्या जागतिक परिस्थितीत संवाद आणि कूटनीतीच्या मार्गावर चालणे अत्यावश्यक आहे. हिंसा आणि संघर्षाऐवजी शांतता, सहअस्तित्व आणि सहकार्य यांना प्राधान्य दिले पाहिजे, असे त्यांनी नमूद केले.
“वसुधैव कुटुंबकम्” या भारतीय तत्त्वज्ञानाचा उल्लेख करत त्यांनी सांगितले की हे तत्त्व जगात एकता आणि बंधुतेचा संदेश देते. एससीओच्या उद्दिष्टांना पुढे नेण्यासाठी भारत आपली रचनात्मक भूमिका कायम ठेवेल, अशीही त्यांनी पुनः पुष्टी केली.
या बैठकीत सदस्य देशांनी प्रादेशिक सुरक्षा, दहशतवाद आणि अतिरेकी कारवाया यांवर सविस्तर चर्चा केली तसेच त्याचा जागतिक शांतता आणि स्थैर्यावर होणाऱ्या परिणामांचा आढावा घेतला.
--------------------
हिंदुस्थान समाचार / Suraj Chaugule
