रत्नागिरी, 3 एप्रिल (हिं.स.) : दिव्यांग रघुनाथ भगवान गोरे (वय 39, तिसंगी, ता. खेड) यांना रत्नागिरीतील आरएचपी फाउंडेशनच्या माध्यमातून निओ मोशन इलेक्ट्रिक व्हीलचेअर उपलब्ध झाली आहे.

रघुनाथ मोरे सात महिन्यांचा असताना पोलिओने ग्रस्त झाला, ज्यामुळे दोन्ही पायांना 90 टक्के अपंगत्व आले आणि त्याला कधीच चालता आले नाही. शिक्षणासाठी त्याला पिंपरी-चिंचवड अपंग विद्यालयात ठेवण्यात आले, जिथे त्याचे नववीपर्यंत शिक्षण झाले. 2004 साली शाळा सोडल्यानंतर रघुनाथ गावी परतला आणि वडिलांना शेतीत मदत करू लागला. शेतीत नुकसान झाल्यामुळे त्याच्या कुटुंबाने शेळीपालनाचा व्यवसाय सुरू केला, ज्यात रघुनाथ शेळीपालनातील साफसफाईसाठी मदत करत असे.

गेल्या पाच वर्षांपासून रत्नागिरीच्या आशादीप संस्थेत रघुनाथ विद्यार्थ्यांवर लक्ष ठेवण्याचे काम करत आहेत, जिथे राहण्याची आणि जेवण्याची सोय आहे.दुसऱ्या बाजूला, व्यवसायासाठी कर्ज घेण्याचा विचार सुरू असताना, मित्राच्या माध्यमातून रघुनाथ यांना आरएचपी फाउंडेशनची माहिती मिळाली. संस्थेचे अध्यक्ष सादिक नाकाडे यांनी त्यांना मार्गदर्शन केले. परंतु ट्रायसिकलने व्यवसाय करणे कठीण असल्याचे लक्षात आल्यावर संस्थेने निओ मोशन व्हीलचेअर मिळवण्यासाठी प्रयत्न सुरू केले. बोरिवलीच्या स्नेहज्योत दिव्यांग प्रतिष्ठानमध्ये नावनोंदणी केल्यानंतर रघुनाथ गोरे यांना इलेक्ट्रिक व्हीलचेअर मिळाली.

नवीन व्हीलचेअरमुळे रघुनाथ आता लांब अंतरावर सहजपणे जाऊ शकतात आणि शारीरिक त्रास खूप कमी झाला आहे. त्यामुळे त्यांचा आत्मविश्वास वाढला असून ते नवीन व्यवसायाच्या कल्पना करण्यास उत्सुक झाले आहेत. रघुनाथ आणि त्यांच्या पालकांनी आरएचपी फाउंडेशन आणि स्नेहज्योत दिव्यांग प्रतिष्ठानचे आभार मानले आहेत.

हिंदुस्थान समाचार / रत्नागिरी