अकोला, 03 एप्रिल (हिं.स.) : अकोला शहरात आज एका मोठ्या अपघाताची शक्यता टळली. पंजाबराव देशमुख कृषी विद्यापीठाच्या मुख्य प्रवेशद्वाराजवळ ही घटना घडली.

मिळालेल्या माहितीनुसार, राज्य परिवहन महामंडळाची (एसटी) बस अचानक अनियंत्रित झाली. बसचे ब्रेक वेळेवर काम करत नसल्यामुळे चालकाचा ताबा सुटला आणि बस रस्त्याच्या कडेला उभ्या असलेल्या क्रेटा कार आणि मॅक्सिमो वाहनावर धडकली. या धडकामुळे दोन्ही वाहनांचे मोठ्या प्रमाणात नुकसान झाले, मात्र सुदैवाने कोणतीही जीवितहानी झाली नाही.

बसमधील प्रवासी आणि परिसरातील नागरिक सर्वजण सुरक्षित असल्यामुळे मोठा अनर्थ टळला. घटनेनंतर परिसरात खळबळ उडाली आणि नागरिकांनी घटनास्थळी गर्दी केली. पोलिसांनी तात्काळ घटनास्थळी धाव घेतली आणि परिस्थिती नियंत्रणात आणली.

अपघातग्रस्त एसटी बस तसेच दोन्ही वाहनांना पुढील तपासासाठी एमआयडीसी पोलीस ठाण्यात नेण्यात आले आहे. पोलिसांनी बसचे ब्रेक निकामी होण्यामागील नेमके कारण शोधण्यास सुरुवात केली असून, या घटनेचा पुढील तपास सुरू आहे.

--------------------

हिंदुस्थान समाचार / जयेश गावंडे