अकोला, 05 एप्रिल (हिं.स.)।

संपूर्ण जगाला शांती, बंधुत्व, प्रेम, त्याग आणि बलिदानाची शिकवण देणारा प्रभू येशू ख्रिस्त हा देवाचा पुत्र असूनही या जगात मानवी देह धारण करुन आला, त्याला मानवाच्या भावना समजल्या म्हणूनच तो स्वत: दोनवेळा रडल्याचा उल्लेख ख्रिश्चन धर्मियांचा पवित्र धर्मग्रंथ बायबलमध्ये आढळून येतो. आपण ज्यावेळी देवाकडे अश्रूपूर्ण नयनांनी धावा करतो त्यावेळी आपल्या अश्रूंची भाषा परमेश्वराला अर्थात देवाला समजते आणि तो आपल्या मदतीसाठी धाव घेतो, असे प्रतिपादन रेव्हरंड व्ही.एल. डोगरदिवे यांनी केले. खदान ख्रिश्चन कॉलनी येथील बेथेल सेव्हिअर्स अलायन्स चर्चमध्ये ईस्टर संडे म्हणजेच येशूंच्या पुनरुत्थान दिनाच्या पार्श्वभूमीवर आयोजित प्रार्थना सभेमध्ये ते बोलत होते.

अकोला शहरासह अकोला जिल्ह्याच्या विविध भागांमध्ये रविवार, ५ एप्रिल रोजी ईस्टर संडे अर्थात प्रभू येशू ख्रिस्तांच्या पुनरुत्थानाचा दिवस हजारो ख्रिश्चन समाजबांधवांनी मोठ्या हर्षोेल्हासात साजरा केला. अबालवृद्धांनी या सणाचा मनमुराद आनंद लुटला. शहरातील प्रोटेस्टंट आणि रोमन कॅथलिक प्रार्थनास्थळांमध्ये यावेळी विशेष प्रार्थनासभांचे तसेच विविध धार्मिक आणि सांस्कृतिक कार्यक्रमांचे आयोजन करण्यात आले होते.

मागील रविवारी प्रभू येशू ख्रिस्तांच्या यरुशलेम प्रवेशानिमित्त जगभरात पाल्म संडे अर्थात झावळ्यांचा रविवार साजरा करण्यात आला. त्यानंतर अखिल मानवजातीच्या पापक्षालनासाठी प्रभू येशूंनी क्रूसखांबावर दिलेल्या बलिदानाची आठवण म्हणून जगभरात ३ एप्रिल रोजी गुड फ्रायडे अर्थात उत्तम शुक्रवार हा सण साजरा करण्यात आला आणि रविवार ५ एप्रिल रोजी येशूंच्या पुनरुत्थानानिमित्त ईस्टर संडे हर्षोेल्हासात साजरा झाला. यावेळी शहर आणि जिल्ह्यात प्रोटेस्टंट आणि कॅथलिक अशा दोन्ही पंथांच्या सुमारे ३० चर्चेसमधून प्रार्थनासभांचे सकाळी आयोजन करण्यात आले. खदान ख्रिश्चन कॉलनी येथील बेथेल सेव्हिअर्स अलायन्स चर्चमध्ये रेव्हरंड व्ही. एल. डोंगरदिवे यांनी ईस्टर निमित्त बायबलमधील वचनांच्या आधारे संदेश दिला. आजच्या अन्याय आणि अत्याचाराने बरबटलेल्या समाजात प्रभू येशूच्या शांती, प्रीती, बंधूभाव, मैत्री आणि त्याग या विचारांचे अनुकरण करण्याची गरज असल्याचे रेव्हरंड डोगरदिवे यांनी सांगितले. येशूंच्या पुनरुत्थानामुळे आम्हाला शांती आणि सुरक्षिततेची हमी मिळाली, येशूने मरणावर विजय प्राप्त केला आहे. येशूंच्या शिकवणीच्या आधारे सर्वानी आचरण करण्याबाबतची मते महात्मा गांधी, डॉ. बाबासाहेब आंबेडकर, महात्मा फुले, बाबा आमटे, विवेकानंद, स्वातंत्र्यवीर सावरकर या विभूतीनी व्यक्त केली आहेत हे त्यांनी संदर्भ देत स्पष्ट केले. त्यांनी यावेळी राज्य आणि देशासोबतच जगातही शांती नांदावी यासाठी प्रार्थना केली. सर्व चर्चेसमधून याप्रसंगी संडेस्कूल, महिला संघ, तरुण संघातील सदस्यांनी प्रभू येशूंच्या पुनरुत्थानाबाबत गीते सादर केली. विविध चर्चमधील नवतरुणांना यावेळी बाप्तिम्स्मा देण्यात आला. तसेच लहान बालकांची अर्पणेही करण्यात आली. गेल्या चाळीस दिवसांपासून ख्रिश्चन धर्मियांचा पवित्र लेन्थ महिना सुरु होता. या चाळीस दिवसांच्या काळात ख्रिश्चन बंधू-भगिनी उपवास आणि प्रार्थना करतात. गुडफ्रायडेच्या दिवशी या उपवासांची सांगता होते. शहरातील सर्वच चर्चेसमध्ये ईस्टर संडे मोठ्या हर्षोेल्हासात साजरा करण्यात आला.

विदर्भात केवळ अकोल्यातच होते

प्रात:समयीची प्रार्थना!

दरम्यान, रविवारी प्रभू येशू खिस्तांच्या पुनरुत्थानानिमित्त बेथेल सेव्हिअर्स अलायन्स चर्चच्या प्रांगणात शनिवारी रात्रीच एक मोठे रिंगण तयार करण्यात आले होते. रविवारी पहाटे सहा वाजता अकोल्यातील सर्वच चर्चचे सदस्य तेथे उपस्थित होऊन प्रात:कालच्या प्रार्थनासभेत सहभागी झाले होते. अशाप्रकारची प्रात:कालची प्रार्थना संपूर्ण विदर्भात केवळ अकोल्यातच होते, हे उल्लेखनीय! त्यानंतर सकाळी नऊ वाजता इंग्रजांच्या काळापासून अस्तित्वात असलेल्या अकोल्यातील एकमेव ख्रिश्चन कॉलनीमधून ज्येष्ठ सदस्य जस्टीन मेश्रामकर, पंच मंडळातील राजेश ठाकूर, अमित ठाकूर, सचिव सरला मेश्रामकर, खजीनदार अरविंद बिरपॉल, असिस्टंट पास्टर वैशाली डोगरदिवे यांच्या नेतृत्वात दिंडी काढण्यात आली. यावेळी प्रभू उठला आहे, खरोखर उठला आहे, अशा घोषणाही देण्यात आल्या. यावेळी ईस्टर संडेनिमित्त विविध गीते सादर करण्यात आली आणि अबालवृद्धांनी गावून, नाचून पुनरुत्थानाचा आनंद व्यक्त केला.

---------------

हिंदुस्थान समाचार / जयेश गावंडे