अहमदाबाद, 22 मे (हिं.स.)। इंडियन प्रीमियर लीग (आयपीएल) २०२६ मध्ये चेन्नई सुपर किंग्ज (सीएसके) संघाचा प्रवास गुजरात टायटन्सविरुद्ध ८९ धावांच्या पराभवासह संपुष्टात आला. संघाला प्लेऑफमध्ये स्थान मिळवण्यात अपयश आले असले, तरी कर्णधार ऋतुराज गायकवाड यांनी संपूर्ण हंगामातील संघाच्या संघर्षाबरोबरच युवा खेळाडूंच्या कामगिरीबद्दल अभिमान व्यक्त केला.

सीएसकेने हंगामाची सुरुवात सलग तीन पराभवांनी केली होती. मात्र त्यानंतर संघाने शानदार पुनरागमन करत प्लेऑफच्या आशा अखेरच्या लीग सामन्यापर्यंत जिवंत ठेवल्या. संघाने १४ सामन्यांत ६ विजय आणि ८ पराभवांसह आपला प्रवास संपवला.

सामन्यानंतर गायकवाड म्हणाले, “हंगामाची सुरुवात आमच्यासाठी खूप कठीण होती, विशेषतः सलग तीन पराभवानंतर. पण त्यानंतर योग्य संयोजन मिळाल्यावर संघाने चांगला क्रिकेट खेळण्यास सुरुवात केली. दुर्दैवाने त्यानंतर दुखापतींनी आम्हाला त्रास दिला. जेमी ओव्हरटन आणि रामकृष्ण घोष यांसारख्या अष्टपैलू खेळाडूंची उणीव संघाच्या समतोलावर परिणाम करणारी ठरली. अखेरच्या तीन सामन्यांमध्ये, आम्हाला कधी कमी फलंदाजांसह तर कधी कमी गोलंदाजांसह क्षेत्ररक्षण करावे लागले.”

ते पुढे म्हणाले की, संघ सध्या संक्रमणाच्या टप्प्यातून जात असून युवा खेळाडूंना अनुभव देण्याचे काम या हंगामात यशस्वीपणे झाले. “अनेक लोक हे मान्य करत नाहीत की आम्ही युवा संघ आहोत आणि संक्रमणाच्या टप्प्यात आहोत. आमच्या ८ ते १० खेळाडूंनी २० पेक्षाही कमी आयपीएल सामने खेळले होते. अशा परिस्थितीत सहा सामने जिंकणे आणि काही शानदार विजय मिळवणे ही अभिमानाची बाब आहे.”

गायकवाड यांनी सनरायझर्स हैदराबादविरुद्धचे दोन सामने निर्णायक ठरल्याचे सांगितले. “हैदराबादमध्ये आम्हाला १० षटकांत ८४ धावा करता आल्या नाहीत, जेव्हा आमच्याकडे सात विकेट्स शिल्लक होत्या. चेन्नईतही आम्ही त्यांना १८० धावांपर्यंत रोखू शकलो असतो. काही सामन्यांत आम्ही विजयाच्या अगदी जवळ पोहोचलो, पण यश मिळवू शकलो नाही.”

सीएसके कर्णधारांनी युवा खेळाडूंचेही भरभरून कौतुक केले. त्यांनी सांगितले की, या हंगामात कार्तिक शर्मा, उर्विल पटेल आणि डेवाल्ड ब्रेविस यांनी स्वतःला सिद्ध केले. “कार्तिकने खूप प्रभावित केले. त्याच्यात पुढे जाण्याची मोठी क्षमता आहे. उर्विलने पहिल्यांदाच संपूर्ण हंगाम खेळला आणि अशा वेळी दबाव असणे स्वाभाविक आहे. मात्र हा अनुभव भविष्यात त्याच्या खूप उपयोगी पडेल.”

माजी कर्णधार महेंद्रसिंह धोनी यांच्या भवितव्याबाबत विचारलेल्या प्रश्नावर गायकवाड म्हणाले, “पुढच्या वर्षीच याबाबत माहिती मिळेल. तुम्हाला आणि मलाही पुढील हंगामातच याची माहिती होईल. या हंगामात त्यांची उणीव निश्चितपणे जाणवली. ते असे खेळाडू आहेत, जे केवळ मैदानावर उपस्थित राहूनही प्रतिस्पर्धी संघावर दबाव निर्माण करू शकतात आणि सामन्याचे चित्र बदलू शकतात.”

सीएसकेसाठी हा हंगाम चढ-उतारांनी भरलेला ठरला. मात्र युवा खेळाडूंना मिळालेला हा अनुभव भविष्यात फ्रँचायझीला अधिक मजबूत बनवेल, अशी आशा संघ व्यवस्थापनाला आहे.

---------------

हिंदुस्थान समाचार / Suraj Chaugule