नवी दिल्ली, 01 जून (हिं.स.)। इलेक्ट्रॉनिक्स सिस्टिम्स डिझाइन अँड मॅन्युफॅक्चरिंग कंपनी मेरिट्रॉनिक्स लिमिटेडचा ७०.०३ कोटी रुपयांचा आयपीओ आज सब्सक्रिप्शनसाठी खुला करण्यात आला. या आयपीओमध्ये ३ जूनपर्यंत बोली लावता येणार आहे. इश्यू बंद झाल्यानंतर ४ जून रोजी शेअर्सचे वाटप केले जाईल, तर ५ जून रोजी वाटप झालेले शेअर्स डीमॅट खात्यात जमा केले जातील. कंपनीचे शेअर्स ८ जून रोजी बीएसईच्या एसएमई प्लॅटफॉर्मवर सूचीबद्ध होऊ शकतात.

या आयपीओसाठी प्रति शेअर १४१ रुपये ते १४९ रुपये असा प्राइस बँड निश्चित करण्यात आला आहे. लॉट साइज १,००० शेअर्सचा ठेवण्यात आला आहे. किरकोळ गुंतवणूकदारांना किमान दोन लॉट म्हणजेच २,००० शेअर्ससाठी बोली लावावी लागणार असून, त्यासाठी २.९८ लाख रुपयांची गुंतवणूक करावी लागेल. या आयपीओअंतर्गत १० रुपये दर्शनी मूल्य असलेले एकूण ४७ लाख नवीन शेअर्स जारी करण्यात येत आहेत. त्यापैकी २.३६ लाख शेअर्स मार्केट मेकरसाठी राखीव ठेवण्यात आले आहेत.

या आयपीओमध्ये पात्र संस्थात्मक खरेदीदारांसाठी (क्यूआयबी) ४९.९१ टक्के हिस्सा राखीव ठेवण्यात आला आहे. याशिवाय किरकोळ गुंतवणूकदारांसाठी ३०.०२ टक्के, तर बिगर संस्थात्मक गुंतवणूकदारांसाठी (एनआयआय) १५.०५ टक्के हिस्सा राखीव आहे. तसेच मार्केट मेकरसाठी ५.०२ टक्के हिस्सा राखून ठेवण्यात आला आहे. या इश्यूसाठी जीवायआर कॅपिटल अॅडव्हायझर्स प्रायव्हेट लिमिटेड यांची बुक रनिंग लीड मॅनेजर म्हणून नियुक्ती करण्यात आली आहे. बिगशेअर सर्व्हिसेस प्रायव्हेट लिमिटेड हे रजिस्ट्रार आहेत, तर गिरिराज स्टॉक ब्रोकिंग प्रायव्हेट लिमिटेड ही कंपनीची मार्केट मेकर आहे.

मेरिट्रॉनिक्स लिमिटेडच्या आर्थिक स्थितीबाबत बोलायचे झाल्यास, भांडवली बाजार नियामक सेबीकडे सादर करण्यात आलेल्या ड्राफ्ट रेड हेरिंग प्रॉस्पेक्टस (डीआरएचपी) नुसार कंपनीची आर्थिक स्थिती सातत्याने मजबूत होत गेली आहे. आर्थिक वर्ष २०२३-२४ मध्ये कंपनीला ३.०५ कोटी रुपयांचा निव्वळ नफा झाला होता. तो पुढील आर्थिक वर्ष २०२४-२५ मध्ये वाढून ८.६६ कोटी रुपयांवर पोहोचला. त्यानंतर आर्थिक वर्ष २०२५-२६ मध्ये कंपनीचा निव्वळ नफा झपाट्याने वाढून १६.१० कोटी रुपयांवर गेला.

याच कालावधीत कंपनीच्या महसुलातही सातत्याने वाढ झाली. आर्थिक वर्ष २०२३-२४ मध्ये कंपनीला ८६.०१ कोटी रुपयांचा महसूल मिळाला होता. तो २०२४-२५ मध्ये वाढून ११४.०४ कोटी रुपयांवर पोहोचला. तर आर्थिक वर्ष २०२५-२६ मध्ये कंपनीचा महसूल १५६.२५ कोटी रुपये इतका झाला.

मात्र, या काळात कंपनीवरील कर्जाचाही भार सातत्याने वाढला. आर्थिक वर्ष २०२३-२४ च्या अखेरीस कंपनीवर १५.८२ कोटी रुपयांचे कर्ज होते. ते २०२४-२५ मध्ये वाढून १८.५७ कोटी रुपयांवर गेले. तर आर्थिक वर्ष २०२५-२६ मध्ये कंपनीवरील कर्जाचा भार ४३.२० कोटी रुपयांपर्यंत वाढला.या कालावधीत कंपनीच्या नेटवर्थमध्येही वाढ झाली. आर्थिक वर्ष २०२३-२४ मध्ये कंपनीची नेटवर्थ ७.५८ कोटी रुपये होती. ती २०२४-२५ मध्ये वाढून १६.२३ कोटी रुपये झाली. तर आर्थिक वर्ष २०२५-२६ मध्ये कंपनीची नेटवर्थ मोठी झेप घेत ५२.५२ कोटी रुपयांवर पोहोचली.

कंपनीच्या राखीव निधी आणि अधिशेषातही वाढ झाली आहे. आर्थिक वर्ष २०२३-२४ मध्ये हा आकडा ६.७३ कोटी रुपये होता. तो २०२४-२५ मध्ये वाढून १५.३९ कोटी रुपये झाला. तसेच आर्थिक वर्ष २०२५-२६ मध्ये कंपनीचा राखीव निधी आणि अधिशेष ४०.३४ कोटी रुपयांवर पोहोचला. तसेच, ईबीआयटीडीए (व्याज, कर, घसारा आणि अमॉर्टायझेशनपूर्व नफा) आर्थिक वर्ष २०२३-२४ मध्ये ६.७३ कोटी रुपये होता. तो २०२४-२५ मध्ये वाढून १५.१८ कोटी रुपये झाला. तर आर्थिक वर्ष २०२५-२६ मध्ये कंपनीचा ईबीआयटीडीए २७.२२ कोटी रुपयांवर पोहोचला.

---------------

हिंदुस्थान समाचार / Suraj Chaugule