नवी दिल्ली, 01 जून (हिं.स.)। अमेरिका आणि इराण यांच्यात पुन्हा वाढलेल्या तणावाच्या पार्श्वभूमीवर कच्च्या तेलाच्या किमतीत झालेली वाढ, विक्रीचा वाढता दबाव आणि ग्राहकोपयोगी वस्तू क्षेत्रातील मोठ्या घसरणीमुळे आठवड्याच्या पहिल्याच दिवशी देशांतर्गत शेअर बाजाराला मोठा फटका बसला. दिवसाची सुरुवात सकारात्मक वातावरणात झाली असली तरी नंतर बाजारात जोरदार विक्री सुरू झाल्याने प्रमुख निर्देशांक घसरले. मुंबई शेअर बाजाराचा सेन्सेक्स दिवसभरातील उच्चांकी पातळीवरून तब्बल १,१६४ अंकांनी घसरला, तर राष्ट्रीय शेअर बाजाराचा निफ्टीही ३७५ अंकांहून अधिक खाली आला. अखेरीस सेन्सेक्स ५०८.४० अंकांच्या म्हणजेच ०.६८ टक्के घसरणीसह ७४,२६७.३४ अंकांवर बंद झाला, तर निफ्टी १६५.१५ अंकांच्या म्हणजेच ०.७० टक्के घसरणीसह २३,३८२.६० अंकांवर स्थिरावला.
दिवसभराच्या व्यवहारात माहिती तंत्रज्ञान, माध्यम आणि धातू क्षेत्रातील समभागांमध्ये खरेदी दिसून आली. त्यामुळे निफ्टीचा माहिती तंत्रज्ञान निर्देशांक २.६६ टक्क्यांच्या वाढीसह बंद झाला. मात्र वाहननिर्मिती, वीज आणि ग्राहकोपयोगी वस्तू क्षेत्रातील समभागांमध्ये मोठी विक्री झाली. बँकिंग, भांडवली वस्तू, आरोग्यसेवा, सार्वजनिक क्षेत्रातील उद्योग तसेच तेल आणि वायू क्षेत्रातील निर्देशांकही घसरणीसह बंद झाले. व्यापक बाजारातही नकारात्मक वातावरण राहिले. मध्यम भांडवल निर्देशांक १.४५ टक्के घसरला, तर लघु भांडवल निर्देशांकात ०.८८ टक्क्यांची घसरण झाली.
बाजारातील या पडझडीमुळे गुंतवणूकदारांच्या संपत्तीत सुमारे ३.७५ लाख कोटी रुपयांची घट झाली. मुंबई शेअर बाजारात सूचीबद्ध कंपन्यांचे एकूण बाजार भांडवल ४६०.७२ लाख कोटी रुपयांवर घसरले. मागील व्यवहारदिनी ते ४६४.४७ लाख कोटी रुपये होते.
दिवसभरातील व्यवहारात ४,५४९ समभागांमध्ये सक्रिय व्यवहार झाले. त्यापैकी १,५८९ समभाग वाढीसह, तर २,७६१ समभाग घसरणीसह बंद झाले. सेन्सेक्समधील ३० पैकी केवळ ६ समभाग वाढले, तर २४ समभाग घसरले. निफ्टीतील ५० पैकी ४० समभाग लाल चिन्हात बंद झाले.
आजच्या व्यवहारात टेक महिंद्रा, इन्फोसिस, कोल इंडिया, टाटा कन्सल्टन्सी सर्व्हिसेस आणि जेएसडब्ल्यू स्टील हे सर्वाधिक वाढणारे समभाग ठरले. दुसरीकडे हिंदुस्तान युनिलिव्हर, टाटा कन्झ्युमर प्रॉडक्ट्स, श्रीराम फायनान्स, मॅक्स हेल्थकेअर आणि आयटीसी या समभागांमध्ये सर्वाधिक घसरण नोंदवली गेली.
---------------
हिंदुस्थान समाचार / Suraj Chaugule
