नवी दिल्ली, 11 जून (हिं.स.)नवी दिल्लीच्या पश्चिम विहार भागातील पंजाबी गायक गुरू रंधावाच्या जिमबाहेर अंदाधुंद गोळीबाराची घटना घडली आहे. प्राथमिक माहितीनुसार, बाईकवरून आलेल्या हल्लेखोरांनी जिमवर अंदाजे सात गोळ्या झाडून घटनास्थळावरून पळ काढला. या घटनेमुळे परिसरात भीतीचे वातावरण निर्माण झाले आहे. मिळालेल्या माहितीनुसार, मोटरसायकलवरून आलेल्या हल्लेखोरांनी जिमबाहेर येताच गोळीबार सुरू केला. गोळ्यांमुळे जिमच्या काचेचे नुकसान झाले. घटनास्थळी उपस्थित असलेल्या लोकांमध्ये घबराट पसरली. मात्र, या घटनेत कोणीही जखमी झाले नाही.

या घटनेनंतर, सोशल मीडियावर एक पोस्ट व्हायरल झाली आहे, ज्यामध्ये लॉरेन्स बिश्नोई गँगने या हल्ल्याची जबाबदारी स्वीकारल्याचा दावा करण्यात आला आहे. एक ऑडिओ क्लिपही सोशल मीडियावर वेगाने प्रसारित होत आहे. या ऑडिओमध्ये, बिश्नोई गँगशी संबंधित असल्याचा दावा करणारा एक व्यक्ती, असे म्हणताना ऐकू येतो की, गुरू रंधावाच्या जिमवर गोळीबार करण्यात आला कारण तो अभिनेता सलमान खानच्या जवळ जात होता आणि सलमान खान हा गँगचा शत्रू आहे. पण, व्हायरल पोस्ट आणि ऑडिओच्या सत्यतेची अद्याप अधिकृतपणे पुष्टी झालेली नाही.

दिल्ली पोलीसही या दाव्यांची चौकशी करत आहे. माहिती मिळताच, पोलिसांची अनेक पथके घटनास्थळी दाखल झाली, त्यांनी परिसर सील केला आणि तपास सुरू केला. गोळीबार करणाऱ्या आरोपीला ओळखण्यासाठी जवळपासच्या सीसीटीव्ही कॅमेऱ्यांमधील फुटेज तपासले जात आहे.

पोलीस अधिकाऱ्यांचे म्हणणे आहे की, प्रकरणाच्या सर्व पैलूंचा तपास केला जात आहे आणि सोशल मीडियावर व्हायरल झालेल्या ऑडिओ आणि पोस्टच्या सत्यतेचीही छाननी केली जात आहे. तपास पूर्ण झाल्यावरच या घटनेमागील खरे कारण स्पष्ट होईल.

---------------

हिंदुस्थान समाचार / वृषाली देशपांडे