नवी दिल्ली, 11 जून (हिं.स.) आयसीसीच्या ताज्या पुरुष एकदिवसीय क्रमवारीत भारतीय संघ अव्वल स्थानी कायम आहे. ताज्या आयसीसी क्रमवारीत भारतीय संघाचे ११८ रेटिंग गुण आहेत. गेल्या वर्षीच्या तुलनेत त्यांच्या रेटिंगमध्ये एका गुणाने घट झाली आहे. न्यूझीलंड ११३ गुणांसह दुसऱ्या स्थानावर आहे. ऑस्ट्रेलिया १०३ गुणांसह तिसऱ्या स्थानावर आहे. पहिल्या १० स्थानांमध्ये केवळ एक मोठा बदल झाला आहे. दक्षिण आफ्रिकेने १०२ गुणांसह पाकिस्तानला मागे टाकून चौथे स्थान पटकावले आहे. पाकिस्तान एकदिवसीय क्रमवारीत एका स्थानाने घसरला असून १०० रेटिंग गुणांसह आता पाचव्या स्थानावर आहे.

भारतीय संघाने एकदिवसीय क्रमवारीत आपले अव्वल स्थान कायम राखले असले तरी, कसोटी क्रमवारीत तो तिसऱ्या स्थानावर आहे. ऑस्ट्रेलिया एकूण १३१ रेटिंग गुणांसह पहिल्या स्थानावर आहे. दक्षिण आफ्रिका ११९ रेटिंग गुणांसह दुसऱ्या स्थानावर आहे. या दोन संघांनंतर भारतीय संघ तिसऱ्या स्थानावर आहे. भारतीय संघाचे १०४ रेटिंग गुण आहेत.

टी-२० आंतरराष्ट्रीय क्रिकेटमध्ये भारतीय संघ अव्वल स्थानावर आहे. ताज्या क्रमवारीत, भारतीय संघाला २७५ रेटिंग गुण मिळाले आहेत. इंग्लंड आणि ऑस्ट्रेलियासारखे संघ त्यानंतरच्या क्रमांकावर आहेत. इंग्लंडला २६२ रेटिंग गुण आहेत, तर ऑस्ट्रेलियाला २५८ गुण आहेत.

---------------

हिंदुस्थान समाचार / वृषाली देशपांडे