रायगड, 12 जून (हिं.स.) : जून महिना अर्ध्यावर आला तरी अपेक्षित मान्सूनपूर्व पावसाने हजेरी न लावल्याने संपूर्ण रायगड जिल्ह्यात उष्णतेची तीव्रता वाढली आहे. वाढत्या तापमानासोबतच उकाड्याने नागरिकांचे हाल होत असून आता सर्वांचे लक्ष वरुणराजाच्या आगमनाकडे लागले आहे.

दिवसभर कडक उन्हाचा तडाखा जाणवत असल्याने बाजारपेठा आणि रस्त्यांवर दुपारच्या वेळेत शुकशुकाट दिसून येत आहे. नागरिक शक्यतो घराबाहेर पडणे टाळत असून उष्णतेपासून बचावासाठी पंखे, कुलर आणि वातानुकूलित यंत्रणांचा वापर वाढला आहे. परिणामी वीज वापरातही लक्षणीय वाढ झाल्याचे दिसून येत आहे.

सततच्या उकाड्यामुळे लहान मुले, ज्येष्ठ नागरिक तसेच दिवसभर मैदानी काम करणाऱ्या कामगार वर्गाला सर्वाधिक त्रास सहन करावा लागत आहे. घामाच्या धारा, अंगाची लाही-लाही आणि अस्वस्थता यामुळे नागरिक त्रस्त झाले आहेत. अनेकजण थंड पेये, नारळपाणी आणि फळांचा आधार घेत उष्णतेचा सामना करत आहेत.

दरम्यान, पावसाच्या प्रतीक्षेत असलेला शेतकरी वर्गही चिंतेत आहे. खरीप हंगामाची तयारी सुरू असली तरी पाऊस लांबल्याने शेतीकामांना वेग मिळालेला नाही. विशेषतः भात लागवडीसाठी आवश्यक असलेला पाऊस अद्याप न झाल्याने शेतकरी आकाशाकडे आशेने पाहत आहेत.

पावसाच्या विलंबामुळे पेरणीचे नियोजनही प्रभावित होण्याची शक्यता व्यक्त होत आहे. हवामान विभागाने लवकरच मान्सून सक्रिय होण्याचा अंदाज वर्तविला असला तरी प्रत्यक्षात पावसाच्या सरी कधी बरसतील, याची उत्सुकता सर्वांनाच लागली आहे. उष्णतेपासून दिलासा मिळावा आणि शेतीला संजीवनी मिळावी, यासाठी श्रीवर्धनकर आता वरुणराजाच्या आगमनाची आतुरतेने वाट पाहत आहेत.

---------------

हिंदुस्थान समाचार / संदेश साळुंके (रायगड)