नांदेड, 13 जून, (हिं.स.)। जिल्हा एड्स प्रतिबंध व नियंत्रण समितीची त्रैमासिक आढावा बैठक अप्पर जिल्हाधिकारी डॉ. रत्नाकर गायकवाड यांच्या अध्यक्षतेखाली जिल्हाधिकारी कार्यालयात संपन्न झाली. या बैठकीस जिल्हा शल्य चिकित्सक डॉ. संजय पेरके यांच्या मार्गदर्शनाखाली एड्स प्रतिबंध व नियंत्रण विभागाचे जिल्हा कार्यक्रम अधिकारी डॉ. कुलदीप अंकुशे यांनी २०२५-२६ तसेच एप्रिल-मे २०२६ मध्ये जिल्ह्यात झालेल्या कामाचा सर्व निर्देशकांनुसार अहवाल सादर केला. यामध्ये एचआयव्ही तपासणी, एआरटी नोंदणी, तालुकानिहाय पॉझिटिव्हिटी, गरोदर मातांची एचआयव्ही तपासणी, टीबी रुग्णांची एचआयव्ही तपासणी तसेच राष्ट्रीय एड्स नियंत्रण कार्यक्रमांतर्गत नोंदणीकृत सामाजिक संस्थांचा आढावा घेण्यात आला. तसेच 'मिशन एड्स सुरक्षा' अंतर्गत जिल्ह्यातील ९५-९५-९९ यांचा आढावा आणि ते लक्ष्य साध्य करण्यासाठी जिल्हा एड्स प्रतिबंध व नियंत्रण विभागाअंतर्गत केले जाणारे कार्य उपस्थितांसमोर सादर केले.

अध्यक्ष यांच्या सूचनेनुसार लक्ष्य साध्य करण्यासाठी पुढील रूपरेषा निश्चित करण्यात आली. याकरिता डीसीआरजी (DCRG) समूहातील सदस्यांनी पुढाकार घेऊन मदत करण्याबाबत आवाहन करण्यात आले. तसेच जिल्ह्यातील वाहतुकीच्या रस्त्यांचे जाळे मोठे असल्या कारणाने अतिजोखमीच्या गटांपैकी एक असलेल्या ट्रकर्स/ड्रायव्हर्स यांच्याकरिता विशेष तपासणी शिबिरांचे आयोजन करण्याबाबत सामाजिक संस्थांना सूचित करण्यात आले. सदर बैठकीस जिल्हा आरोग्य अधिकारी डॉ. संतोष सूर्यवंशी, आरोग्य अधिकारी मनपा डॉ. गजानन रिठे, वरिष्ठ वैद्यकीय अधिकारी एआरटी डॉ. प्रदिप जाधव, जिल्हा क्षयरोग अधिकारी, माहिती अधिकारी श्रीमती अलका पाटील, जिल्हा आरसीएच अधिकारी, डीसीआरजी सदस्य, अशासकीय संस्थांचे पदाधिकारी आदींची उपस्थिती होती.

---------------

हिंदुस्थान समाचार / Sangita Hanumant Rao Chitanis