लातूर, 28 जून (हिं.स.)राज्यातील शिक्षक पात्रता परीक्षा (TET) पेपरफुटी प्रकरणामुळे शिक्षण क्षेत्रात पुन्हा एकदा खळबळ उडाली असून, या प्रकरणावर लातूर शहराचे आमदार अमित देशमुख यांनी तीव्र प्रतिक्रिया व्यक्त केली आहे. आपल्या सोशल मीडिया पोस्टद्वारे त्यांनी राज्य आणि केंद्रातील परीक्षा व्यवस्थेवर गंभीर प्रश्न उपस्थित करत, पेपरफुटीच्या वाढत्या घटनांमुळे विद्यार्थ्यांचा विश्वास डळमळीत होत असल्याचे म्हटले आहे.
आमदार अमित देशमुख यांनी आपल्या प्रतिक्रियेत नमूद केले आहे की, देशव्यापी NEET पेपरफुटी प्रकरणातील दोषींवर अद्याप ठोस कारवाई आणि जबाबदारी निश्चित झालेली नसताना महाराष्ट्रातील TET परीक्षेचा पेपर फुटल्याची घटना अत्यंत गंभीर आहे. महाराष्ट्र राज्य परीक्षा परिषदेला अखेर परीक्षा रद्द करण्याचा निर्णय घ्यावा लागला, हीच संपूर्ण व्यवस्थेच्या अपयशाची कबुली असल्याचे त्यांनी सूचित केले.
देशमुख यांच्या मते, गेल्या काही वर्षांत विविध भरती आणि स्पर्धा परीक्षांच्या पेपरफुटीच्या घटनांनी गुणवंत आणि मेहनती विद्यार्थ्यांवर अन्याय केला आहे. लाखो विद्यार्थी अनेक महिने अभ्यास करून परीक्षा देतात; मात्र काही मोजक्या गैरप्रकारांमुळे त्यांच्या भविष्याशी खेळ केला जातो. NEET नंतर आता TET परीक्षेवरही संशयाची छाया पडल्याने परीक्षा प्रक्रियेच्या पारदर्शकतेवर गंभीर प्रश्न निर्माण झाले आहेत.विशेष म्हणजे, TET परीक्षेसाठी राज्यभरातील लाखो उमेदवार तयारी करत होते. परीक्षा रद्द झाल्यामुळे हजारो विद्यार्थ्यांचा वेळ, श्रम आणि आर्थिक खर्च वाया गेला असून, या घटनेमुळे भावी शिक्षकांमध्येही तीव्र नाराजी निर्माण झाली आहे.
आमदार अमित देशमुख यांनी शासनाला परीक्षा व्यवस्थेतील त्रुटी दूर करून भविष्यात अशा घटना रोखण्यासाठी कठोर आणि पारदर्शक यंत्रणा उभारण्याची मागणी केली आहे. केवळ पेपरफुटीनंतर परीक्षा रद्द करणे हा उपाय नसून, दोषींना कठोर शिक्षा आणि जबाबदारी निश्चित करणे आवश्यक असल्याचे त्यांनी स्पष्ट केले आहे.
राज्यात भरती परीक्षा असो, व्यावसायिक प्रवेश परीक्षा असो किंवा शिक्षक पात्रता परीक्षा—सततच्या पेपरफुटीच्या घटनांमुळे विद्यार्थ्यांचा व्यवस्थेवरील विश्वास कमी होत चालल्याची भावना व्यक्त होत आहे. त्यामुळे आता सरकारने केवळ आश्वासने न देता परीक्षा सुरक्षेसाठी ठोस आणि परिणामकारक उपाययोजना करणे ही काळाची गरज असल्याचे मत व्यक्त होत आहे.
---------------
हिंदुस्थान समाचार / Mahesh Madanrao Chitnis
