बीड, 28 जून (हिं.स.)। केज तालुक्यातील टाकळी येथे घडलेल्या विलास घुले हत्या प्रकरणाच्या तपासाला आता एक नवे वळण मिळाले असून, बीडचे खासदार बजरंग सोनवणे यांनी या संपूर्ण प्रकरणातील संशयास्पद बाबींवर अत्यंत परखड आणि आक्रमक भूमिका मांडली आहे. या प्रकरणाच्या पुरवणी जबाबात खासदार सोनवणे यांच्या मुलाचे नाव आल्यानंतर जिल्ह्यात राजकीय वातावरण कमालीचे तापले आहे. या पार्श्वभूमीवर अधिकृत वक्तव्य करताना खासदार सोनवणे यांनी गुन्ह्याच्या मूळ उद्देशावरच मोठे प्रश्नचिन्ह उपस्थित केले असून, पोलीस प्रशासनाने राजकीय दबावाला बळी न पडता मूळ कारणांचा शोध घ्यावा, अशी मागणी केली आहे. विलास घुले यांच्या हत्येमागे नेमके काय कारस्थान होते आणि यात कोणाचा फायदा होता, याची सत्यता समोर येणे गरजेचे असल्याचे त्यांनी म्हटले आहे.
खासदार बजरंग सोनवणे यांनी या प्रकरणातील तांत्रिक आणि तपासातील त्रुटींवर बोट ठेवत दोन मुख्य मुद्द्यांना विशेष हायलाइट केले आहे. त्यांचा पहिला महत्त्वाचा प्रश्न हा आहे की, घटनेच्या दिवशी संबंधित मारेकरी हे मूळतः 'माने' नावाच्या व्यक्तीला मारण्यासाठी का आले होते? हॉटेलवर काम करणाऱ्या आणि अत्यंत हलाखीची परिस्थिती असलेल्या एका साध्या कर्मचाऱ्याचा जीव घेण्यासाठी इतके मोठे कटकारस्थान रचण्याचे काय कारण होते, याचा खुलासा पोलिसांनी आधी केला पाहिजे. माने या व्यक्तीने नेमका काय गुन्हा केला होता की त्याला मारण्यासाठी कटर रचून लोक आले होते, हा मूळ प्रश्न असून या गुन्ह्याचा मास्टरमाइंड कोण आहे, याचा शोध घेणे अत्यंत आवश्यक आहे. या मानेच्या मागे आणखी कोण आहे की जुन्या कुठल्यातरी गुन्ह्यावर पांघरूण घालण्यासाठी ही नवी स्टोरी रचली जात आहे, असा संशय त्यांनी व्यक्त केला.
हिंदुस्थान समाचार / Aparna Chitnis
