रायगड, 29 जून (हिं.स.)। अलिबाग येथील जिल्हा सामान्य रुग्णालयात रविवारी (दि. २८ जून) रात्री दुसऱ्या मजल्यावरील स्लॅबचा काही भाग अचानक कोसळल्याने एकच खळबळ उडाली. सुदैवाने या घटनेत कोणतीही जीवितहानी झाली नसली, तरी रुग्ण, त्यांच्या नातेवाईकांसह रुग्णालयातील कर्मचाऱ्यांच्या सुरक्षेचा गंभीर प्रश्न पुन्हा एकदा ऐरणीवर आला आहे.

मिळालेल्या माहितीनुसार, रात्री सुमारे सव्वाअकरा वाजण्याच्या सुमारास प्रसूती पश्चात काळजी कक्ष आणि सर्जिकल वॉर्डदरम्यान असलेल्या प्रवेशद्वारावरील स्लॅब अचानक कोसळला. या मार्गावरून रुग्णांचे नातेवाईक आणि कर्मचारी नियमितपणे ये-जा करत असल्याने मोठा अनर्थ टळल्याची भावना व्यक्त होत आहे.

अलिबाग जिल्हा सामान्य रुग्णालयात रुग्णसेवेशी संबंधित अनेक समस्या यापूर्वीही समोर आल्या आहेत. डॉक्टरांची कमतरता, आवश्यक औषधांचा तुटवडा, अपुरी पार्किंग व्यवस्था आणि इतर मूलभूत सुविधांच्या प्रश्नांमुळे हे रुग्णालय सातत्याने चर्चेत राहिले आहे. आता स्लॅब कोसळल्याच्या घटनेने रुग्णालयाच्या इमारतीच्या सुरक्षिततेबाबतही गंभीर प्रश्न निर्माण झाले आहेत.

विशेष म्हणजे, या रुग्णालयाच्या दुरुस्तीसाठी सार्वजनिक बांधकाम विभागामार्फत कोट्यवधी रुपयांचा निधी खर्च करण्यात आला होता. मात्र, एवढा खर्च करूनही स्लॅब कोसळल्याने दुरुस्तीच्या दर्जावर नागरिकांनी प्रश्नचिन्ह उपस्थित केले आहे. निकृष्ट दर्जाच्या कामामुळेच ही घटना घडल्याचा आरोप होत असून संबंधित कामाची तातडीने चौकशी करून दोषींवर कारवाई करावी, अशी मागणी नागरिकांकडून करण्यात येत आहे.

दरम्यान, रुग्णालय प्रशासनाने घटनास्थळाची पाहणी करून परिसर सुरक्षित केला असून पुढील तांत्रिक तपासणी आणि आवश्यक दुरुस्तीची प्रक्रिया सुरू करण्यात येणार असल्याची माहिती मिळाली आहे.

---------------

हिंदुस्थान समाचार / संदेश साळुंके (रायगड)