बंगळुरू , 05 जून (हिं.स.)।कर्नाटक सरकारमध्ये खात्यांचे वाटप झाल्यानंतर मंत्री रामलिंगा रेड्डी यांची नाराजी उघड झाली आहे. त्यांना जलसंपदा विभाग देण्यात आल्याने ते समाधानी नसल्याचे समोर आले असून त्यांनी याबाबत आपली नाराजीही व्यक्त केली होती. या नाराजीच्या पार्श्वभूमीवर त्यांनी अखेर मंत्रीपदाचा राजीनामा दिला आहे. रामलिंगा रेड्डी यांच्या राजीनाम्यानंतर काँग्रेसमध्ये राजकीय हालचालींना वेग आला आहे.

राजीनाम्यानंतर रामलिंगा रेड्डी यांनी स्पष्ट केले की, त्यांनी केवळ मंत्रीपदाचा राजीनामा दिला असून काँग्रेस पक्ष सोडलेला नाही. ते म्हणाले, “मी माझ्या अंतरात्म्याच्या विरोधात काम करू शकत नाही, त्यामुळे मंत्रीपदाचा राजीनामा देत आहे.” तसेच ते आमदार म्हणून कायम राहणार असून काँग्रेसमधून राजीनामा देणार नसल्याचेही त्यांनी सांगितले.

रामलिंगा रेड्डी म्हणाले की, ते गेली ५३ वर्षे काँग्रेसशी जोडलेले आहेत आणि पक्षाप्रती त्यांची निष्ठा कायम आहे. त्यांनी कधीही कोणाकडे मंत्रीपदाची मागणी केलेली नाही. माजी मुख्यमंत्री एम. वीरप्पा मोईली आणि एस. एम. कृष्णा यांच्या सरकारमध्येही त्यांनी मंत्री म्हणून काम केले असून पक्षाने त्यांच्यावर नेहमीच जबाबदाऱ्या सोपवल्याचे त्यांनी नमूद केले. संघटना आणि सरकार या दोन्ही स्तरांवर त्यांनी दीर्घकाळ काम केल्याचेही त्यांनी सांगितले.

दरम्यान, मुख्यमंत्री डी. के. शिवकुमार यांनी गुरुवारी रात्री आपल्या १३ मंत्र्यांमध्ये खात्यांचे वाटप केले. त्यामध्ये रामलिंगा रेड्डी यांच्याकडे जलसंपदा विभागाची जबाबदारी सोपवण्यात आली. मात्र, सूत्रांच्या माहितीनुसार रेड्डी यांना बंगळुरू विकास विभाग मिळेल, अशी अपेक्षा होती आणि त्यांनी या विभागावर दावा देखील केला होता.

सूत्रांच्या माहितीनुसार, खात्यांच्या वाटपाबाबत गुरुवारी झालेल्या बैठकीत रामलिंगा रेड्डी यांनी आपली नाराजी व्यक्त करत बैठक अर्धवट सोडून बाहेर पडल्याचे सांगितले जात आहे. यावेळी त्यांनी मुख्यमंत्र्यांना २०२३ मध्ये दिलेल्या त्या आश्वासनाची आठवण करून दिली, ज्यामध्ये भविष्यात मंत्रिमंडळ फेरबदल झाल्यास त्यांना बंगळुरू विकास विभाग दिला जाईल, असे कथितरित्या सांगण्यात आले होते.

माध्यमांच्या वृत्तानुसार, आठ वेळा आमदार म्हणून निवडून आलेल्या रामलिंगा रेड्डी यांनी बंगळुरू विकास विभागाशिवाय अन्य कोणतेही खाते स्वीकारण्यास नकार दिला होता. मात्र, त्यांना त्याऐवजी सिंचन विभाग देण्यात आला. दुसरीकडे, कर्नाटक सरकारमधील सर्वात महत्त्वाच्या विभागांपैकी एक मानला जाणारा बंगळुरू विकास विभाग कृष्णा बायरे गौडा यांच्याकडे सोपवण्यात आला आहे.

---------------

हिंदुस्थान समाचार / Priyanka Bansode