ढाका, 17 जुलै (हिं.स.)।बांग्लादेश नॅशनलिस्ट पार्टी (बीएनपी)चे कार्यवाहक अध्यक्ष तारिक रहमान यांच्या नेतृत्वाखालील सरकारला मोठे यश मिळाले आहे. बांग्लादेशचे माजी राष्ट्रपती झियाउर रहमान यांच्या हत्येप्रकरणातील आरोपी आणि बांग्लादेश लष्कराचे माजी मेजर मुजफ्फर हुसेन याला तब्बल ४५ वर्षे फरार राहिल्यानंतर अटक करण्यात आली आहे.

अटकेनंतर आवश्यक कायदेशीर प्रक्रिया पूर्ण करून पोलिसांनी मुजफ्फर हुसेन याला पुढील कारवाईसाठी बांग्लादेश लष्कराच्या ताब्यात दिले आहे. त्याच्याविरुद्ध प्रलंबित असलेल्या कोर्ट मार्शलची प्रक्रिया आता पूर्ण केली जाणार आहे.

प्रकरणातील कागदपत्रांनुसार, ३० मे १९८१ रोजी चिटगाव सर्किट हाऊसमध्ये तत्कालीन राष्ट्रपती झियाउर रहमान यांच्यावर जीवघेणा गोळीबार करणारा प्रमुख आरोपी मुजफ्फर हुसेन असल्याचा आरोप आहे. ३० मे १९८१ च्या पहाटे मध्यम स्तरावरील काही लष्करी अधिकाऱ्यांच्या गटाने चिटगाव सर्किट हाऊसवर हल्ला केला होता. या हल्ल्यात सत्ताधारी बीएनपीचे संस्थापक आणि तत्कालीन राष्ट्रपती झियाउर रहमान यांची हत्या करण्यात आली होती. अधिकाऱ्यांच्या माहितीनुसार, मुजफ्फर हुसेन आणि कॅप्टन मोस्लेह उद्दीन हे त्या अधिकाऱ्यांपैकी होते, जे या हत्याकांडात थेट सहभागी होते.

ढाका महानगर गुप्तहेर पोलिसांनी दिलेल्या माहितीनुसार, माजी मेजर मुजफ्फर हुसेन याला ४५ वर्षांनंतर ढाका येथील बनानी डीओएचएस परिसरातून अटक करण्यात आली. सरकारी सूत्रांनी सांगितले की, सर्व कायदेशीर औपचारिकता पूर्ण झाल्यानंतर पोलिसांनी त्याला बांग्लादेश लष्कराच्या ताब्यात दिले असून, त्याच्यावरील प्रलंबित कोर्ट मार्शलची प्रक्रिया आता पुढे राबवली जाणार आहे.

---------------

हिंदुस्थान समाचार / Priyanka Bansode