बीड, 24 जुलै (हिं.स.)। अंबाजोगाई - दिल्लीतील जंतर-मंतर येथे शांततामय आंदोलन करणाऱ्या विद्यार्थ्यांवर आणि ज्येष्ठ शिक्षणतज्ज्ञ सोनम वांगचुक यांच्या उपोषणस्थळी पोलिसांनी केलेल्या कथित लाठीहल्ल्याच्या निषेधार्थ अंबाजोगाईतील 'संविधान प्रेमी विधिज्ञ वकील संघा'च्या वतीने तीव्र निषेध व्यक्त करण्यात आला. या घटनेची उच्चस्तरीय चौकशी करून दोषींवर कठोर कारवाई करण्याची मागणी करणारे निवेदन महामहिम राष्ट्रपती यांच्या नावे अंबाजोगाईच्या उपविभागीय अधिकाऱ्यांना देण्यात आले.

देशात वारंवार होणाऱ्या पेपरफुटीमुळे हजारो विद्यार्थ्यांचे भवितव्य अंधकारमय झाले आहे. या परिस्थितीला कंटाळून अनेक तरुण नैराश्याने टोकाचे पाऊल उचलत आहेत. पेपरफुटीला आळा घालावा, शैक्षणिक व्यवस्थेत सुधारणा व्हाव्यात आणि केंद्रीय शिक्षणमंत्र्यांनी नैतिक जबाबदारी स्वीकारावी या मागण्यांसाठी विद्यार्थ्यांनी जंतर-मंतर येथे अहिंसक मार्गाने आंदोलन सुरू केले होते. या आंदोलनाला पाठिंबा म्हणून प्रसिद्ध शास्त्रज्ञ आणि पर्यावरणवादी सोनम वांगचुक यांनीही बेमुदत उपोषण सुरू केले होते.

मात्र २६ जून रोजी शांततेने मोर्चा काढणाऱ्या विद्यार्थ्यांवर पोलिसांनी बळाचा वापर करून लाठीमार केला. या घटनेत अनेक विद्यार्थी जखमी झाल्याचा आरोप करण्यात आला आहे. लोकशाही मार्गाने आपले म्हणणे मांडणाऱ्या विद्यार्थ्यांवर झालेल्या या कारवाईचा देशभरातून निषेध होत आहे.

निवेदनातील प्रमुख मागण्या पुढीलप्रमाणे

1. चौकशीची मागणी

जंतर-मंतरवरील विद्यार्थी आणि आंदोलकांवर झालेल्या लाठीहल्ल्याची निष्पक्ष आणि उच्चस्तरीय चौकशी करून दोषींवर कडक कायदेशीर कारवाई करण्यात यावी.

2. राजीनाम्याची मागणी

देशातील पेपरफुटीच्या वाढत्या घटनांची नैतिक जबाबदारी स्वीकारून केंद्रीय शिक्षणमंत्री धर्मेंद्र प्रधान यांनी तातडीने राजीनामा द्यावा.

3. शैक्षणिक सुधारणा

विद्यार्थ्यांचे नुकसान टाळण्यासाठी भारतीय शिक्षण व्यवस्थेत पारदर्शकता आणणाऱ्या व्यापक सुधारणा त्वरित लागू कराव्यात.

यावेळी बोलताना वकील संघाच्या पदाधिकाऱ्यांनी सांगितले की, कायद्याचे अभ्यासक आणि संविधानाचे रक्षक म्हणून अन्यायाविरुद्ध आवाज उठवणे हे आमचे कर्तव्य आहे. महामहिम राष्ट्रपतींनी या प्रकरणात तातडीने लक्ष घालून विद्यार्थ्यांना न्याय द्यावा.

या निवेदनावर ॲड. अजय बुरांडे, ॲड. बाबुराव तिडके, ॲड. माणिक आदमाने, ॲड. माधव जाधव, ॲड. इस्माईल गवळी, ॲड. विलास लोखंडे, ॲड. शिवाजी कांबळे, ॲड. विजय चव्हाण, ॲड. दिलीप गोरे, ॲड. सचिन शेप यांच्यासह अनेक वकिलांच्या स्वाक्षऱ्या आहेत.

---------------

हिंदुस्थान समाचार / Aparna Chitnis