मुंबई, 11 ऑगस्ट, (हिं.स.)। अभिनेता इमरान हाश्मी सध्या त्याच्या आगामी 'आवारापन २' (Awarapan 2) या चित्रपटामुळे चर्चेत आहे. याच दरम्यान, दिग्गज संगीतकार आर.डी. बर्मन यांच्या जीवनावर आधारित चित्रपटात (बायोपिक) तो काम करणार असल्याच्या चर्चांना उधाण आले होते. फरहान अख्तरची मुख्य भूमिका असलेल्या या चित्रपटात इमरान हाश्मी प्रसिद्ध अभिनेते मेहमूद यांची भूमिका साकारणार असल्याचा अंदाज लावला जात होता. सोशल मीडियावर ही बातमी वेगाने पसरल्यानंतर, खुद्द इमरान हाश्मीने पुढे येऊन या अफवांचे खंडन केले.

आपल्या 'एक्स' खात्यावरून इमरान ने स्पष्ट केले की, तो या बायोपिकचा भाग नाही. त्याने लिहिले, मी हे स्पष्ट करू इच्छितो की, या बायोपिकमध्ये मेहमूद साहेब यांची भूमिका साकारण्याबाबतच्या बातम्या खोट्या आहेत. मला या चित्रपटासाठी विचारणाही करण्यात आलेली नाही आणि मी यात कामही करत नाहीये. अभिनेत्याच्या या विधानामुळे या प्रकल्पातील त्याच्या सहभागाबाबत सुरू असलेल्या चर्चांना पूर्णविराम मिळाला आहे.

दरम्यान, आर.डी. बर्मन यांच्या जीवनावर आधारित या चित्रपटाच्या संदर्भात अक्षय कुमारच्या नावाचीही चर्चा होत आहे. वृत्तानुसार, अक्षय यात त्याचे सासरे आणि दिग्गज अभिनेते राजेश खन्ना यांची 'कॅमिओ' (छोटीशी) भूमिका साकारण्याची शक्यता आहे. मात्र, याबाबत अक्षय कुमारकडून अद्याप कोणतीही अधिकृत माहिती मिळालेली नाही. या बायोपिकमध्ये फरहान अख्तर आर.डी. बर्मन यांची भूमिका साकारत आहे, तर नीरज पांडे या चित्रपटाचे दिग्दर्शन करत आहेत.

---------------

हिंदुस्थान समाचार / हर्षदा गावकर