वॉशिंग्टन , 23 ऑगस्ट (हिं.स.)।अमेरिकेचे राष्ट्राध्यक्ष डोनाल्ड ट्रम्प यांनी रविवारी पुन्हा एकदा होर्मुझ सामुद्रधुनीचा नकाशा पोस्ट करत, त्याला अमेरिकेचा नवा भूभाग असल्याचे म्हटले. होर्मुझ सामुद्रधुनी हा जगभरात तेल, नैसर्गिक वायू आणि इतर वस्तूंच्या पुरवठ्यासाठी अत्यंत महत्त्वाचा सागरी मार्ग आहे.

ट्रम्प यांनी त्यांच्या ‘ट्रुथ सोशल’ या सोशल मीडिया प्लॅटफॉर्मवर एक नकाशा पोस्ट केला. या नकाशामध्ये या महत्त्वाच्या सागरी मार्गाभोवती वर्तुळ काढण्यात आले होते. 28 फेब्रुवारीला युद्ध सुरू झाल्यापासून इराणने हा सागरी मार्ग बंद केला आहे. त्यावेळीही ट्रम्प यांनी होर्मुझला अमेरिकेचा नवा भूभाग असल्याचे म्हटले होते.

यापूर्वी 18 ऑगस्ट रोजीही ट्रम्प यांनी हाच नकाशा पोस्ट केला होता. अमेरिकेच्या राष्ट्राध्यक्षांनी सर्वप्रथम 15 ऑगस्ट रोजी या सामुद्रधुनीला अमेरिकन भूभागाचा भाग घोषित करण्याबाबत वक्तव्य केले होते. न्यूयॉर्कमधील एका सभेत ते म्हणाले होते, “इराणचा दारुण पराभव केल्यानंतर मी लवकरच होर्मुझ सामुद्रधुनीला अमेरिकेचा भूभाग घोषित करणार आहे.” त्यानंतर त्यांनी स्पष्टपणे म्हटले, “हे खरे आहे.”

एकीकडे इराण होर्मुझ सामुद्रधुनीवर आपले नियंत्रण असल्याचा दावा करत आहे, तर दुसरीकडे ट्रम्प यांचा दावा आहे की या सामुद्रधुनीवर अमेरिकेचे पूर्ण नियंत्रण आहे. इराणने शनिवारी स्पष्ट केले की, अमेरिका आपली आश्वासने पूर्ण करेपर्यंत आणि आपले वर्तन सुधारत नाही तोपर्यंत होर्मुझ सामुद्रधुनी बंदच राहील.इराणच्या सर्वोच्च राष्ट्रीय सुरक्षा परिषदेचे प्रमुख मोहसिन रेजाई यांनी सरकारी दूरचित्रवाणीवर सांगितले, “अमेरिकेच्या दाव्यांनंतरही होर्मुझ सामुद्रधुनी बंद आहे आणि अमेरिका आपले वर्तन सुधारेपर्यंत ती पुन्हा खुली केली जाणार नाही.” ते पुढे म्हणाले, “यावेळी अमेरिकेला सर्वप्रथम आपल्या जबाबदाऱ्या पूर्ण कराव्या लागतील.” रेजाई यांनी पुढे म्हटले, “अमेरिकेने सुरू केलेल्या आर्थिक युद्धात सहभागी होऊ नये, असे आम्ही सर्व देशांना सांगत आहोत.” त्यांनी इशारा देत म्हटले, “इराणविरोधात आर्थिक निर्बंध लादण्यात सहभागी होणाऱ्या कोणत्याही देशाला शत्रू मानले जाईल.”

---------------

हिंदुस्थान समाचार / Priyanka Bansode